బంగారం Vs ఈపీఎఫ్‌: 15 ఏళ్లలో ఏది ఎక్కువ సంపద సృష్టించింది?

పెట్టుబడుల విషయంలో భారతీయులకు బంగారంపై ఉన్న నమ్మకం చాలా ప్రత్యేకమైనది. ఆర్థిక ఇబ్బందులు వచ్చినా, అత్యవసర పరిస్థితులు ఎదురైనా ఆదుకునేది బంగారమే అన్న భావన చాలా కుటుంబాల్లో ఇప్పటికీ కనిపిస్తుంది. మరోవైపు ఉద్యోగులు భవిష్యత్‌ భద్రత కోసం ఈపీఎఫ్‌పై ఆధారపడుతుంటారు. ఒకటి సంప్రదాయ పెట్టుబడి మార్గం అయితే.. మరొకటి పదవీ విరమణ తర్వాత ఆర్థిక అండగా నిలిచే పథకం. మరి గత 15 ఏళ్లలో ఈ రెండింటిలో ఏది పెట్టుబడిదారులకు ఎక్కువ సంపదను సృష్టించింది? లెక్కలు ఆసక్తికర విషయాలను చెబుతున్నాయి.

భారీగా పెరిగిన విలువ
గత 15 ఏళ్లలో బంగారం ధరలు అనూహ్యంగా పెరిగాయి. 2011లో 24 క్యారెట్ల బంగారం 10 గ్రాముల ధర సగటున రూ.25,700 ఉండేది. అంతర్జాతీయ ఆర్థిక అనిశ్చితి, ద్రవ్యోల్బణం, కేంద్ర బ్యాంకుల కొనుగోళ్లు, ప్రపంచవ్యాప్తంగా చోటుచేసుకున్న భౌగోళిక ఉద్రిక్తతలు బంగారం ధరలకు ఊతమిచ్చాయి. ఫలితంగా 2026 నాటికి 10 గ్రాముల బంగారం ధర సగటున రూ.1.46 లక్షల స్థాయికి చేరుకుంది. ఈ కాలంలో బంగారంలో రూ.1 లక్ష పెట్టుబడి పెట్టిన వ్యక్తికి సగటున 12.2 శాతం వార్షిక రాబడి లభించినట్లు అంచనా. దీంతో అతని పెట్టుబడి విలువ రూ.5.62 లక్షలకు పెరిగింది. అంటే అసలు పెట్టుబడిపై రూ.4.62 లక్షల లాభం వచ్చినట్లవుతుంది.

స్థిరత్వానికి ఈపీఎఫ్‌
ఉద్యోగుల కోసం కేంద్ర ప్రభుత్వం నిర్వహించే ఎంప్లాయీస్‌ ప్రావిడెంట్‌ ఫండ్‌ పథకం దేశంలో అత్యంత ప్రజాదరణ పొందిన పొదుపు సాధనాల్లో ఒకటి. ప్రతి నెల ఉద్యోగి, యజమాని చెల్లించే మొత్తాలపై ప్రభుత్వం నిర్ణయించే వడ్డీ వర్తిస్తుంది. మార్కెట్‌ హెచ్చుతగ్గులతో సంబంధం లేకుండా స్థిరమైన రాబడులు అందించడం ఈపీఎఫ్‌ ప్రత్యేకత. గత 15 ఏళ్లలో ఈపీఎఫ్‌ వడ్డీ రేట్లు ఎక్కువగా 8 నుంచి 9 శాతం మధ్యే కొనసాగాయి. సగటున 8.5 శాతం రాబడి ప్రాతిపదికన చూస్తే రూ.1 లక్ష పెట్టుబడి 15 ఏళ్ల తర్వాత రూ.3.40 లక్షలకు చేరుతుంది. ఇందులో లాభం సుమారు రూ.2.40 లక్షలు.

లెక్కలు ఏం చెబుతున్నాయి?
ఈ రెండు పెట్టుబడులను పక్కపక్కన ఉంచి చూస్తే సంపద సృష్టి విషయంలో బంగారం స్పష్టమైన ఆధిక్యం కనబరిచింది. బంగారంలో పెట్టిన రూ.లక్ష విలువ రూ.5.62 లక్షలకు పెరగ్గా ఈపీఎఫ్‌లో అదే మొత్తం రూ.3.40 లక్షలకే పరిమితమైంది. అంటే రాబడుల పరంగా బంగారం గెలిచినట్లు కనిపిస్తోంది. అయితే ఈ పోలికను కేవలం రాబడుల వరకే పరిమితం చేయాలని ఆర్థిక నిపుణులు సూచిస్తున్నారు. ఎందుకంటే బంగారం ధరలు మార్కెట్‌ పరిస్థితులను బట్టి మారుతుంటాయి. ఈపీఎఫ్‌ మాత్రం స్థిరమైన, ముందే అంచనా వేయగలిగే రాబడులను అందిస్తుంది.

ఏది ఎంచుకోవాలి?
బంగారం, ఈపీఎఫ్‌లను ఒకదానికొకటి ప్రత్యామ్నాయంగా చూడొద్దని నిపుణులు చెబుతున్నారు. ఈపీఎఫ్‌ పదవీ విరమణ తర్వాత ఆర్థిక భద్రతను అందిస్తే, బంగారం ద్రవ్యోల్బణం నుంచి రక్షణ కల్పించడంలో కీలక పాత్ర పోషిస్తుంది. దీర్ఘకాలిక ఆర్థిక లక్ష్యాలను దృష్టిలో ఉంచుకుని ఈ రెండింటికీ పెట్టుబడి పోర్ట్‌ఫోలియోలో స్థానం కల్పిస్తే మెరుగైన ఫలితాలు పొందే అవకాశం ఉంటుంది.