లిఫ్టులో ముద్దు ఎంత పనిచేసింది!.. కుప్పకూలిన బిలియనీర్ కంపెనీ!
- ఎన్విడియా సప్లయర్ కంపెనీ చైర్మన్ 'ముద్దు' వీడియో వైరల్
- ఒక్క రోజులోనే 9 శాతం పైగా పతనమైన కంపెనీ షేర్లు
- మార్కెట్ విలువలో 2.9 బిలియన్ డాలర్ల భారీ నష్టం
- ఇది వ్యక్తిగతమని, కంపెనీకి సంబంధం లేదని యాజమాన్యం ప్రకటన
- ఆ తర్వాత పుంజుకున్న షేర్లు, నిలకడగా మారిన మార్కెట్
వివరాల్లోకి వెళితే, విక్టరీ జెయింట్ టెక్నాలజీ వ్యవస్థాపకుడు, 54 ఏళ్ల చెన్ టావోకు సంబంధించిన ఈ వీడియో జూన్ 6న చైనా సోషల్ మీడియా ప్లాట్ఫామ్ డౌయిన్లో ప్రత్యక్షమైంది. ఈ వీడియో వేగంగా వ్యాపించడంతో కంపెనీ భవిష్యత్తుపై ఆందోళన చెందిన మదుపర్లు షేర్లను విక్రయించడానికి మొగ్గు చూపారు. దీనివల్ల జూన్ 8న ఇంట్రాడేలో కంపెనీ షేర్ విలువ 9 శాతానికి పైగా పతనమైంది. విక్టరీ జెయింట్ టెక్నాలజీ సంస్థ ఏఐ సర్వర్లకు అవసరమైన ప్రింటెడ్ సర్క్యూట్ బోర్డుల (పీసీబీ) తయారీలో అగ్రగామిగా కొనసాగుతుంది.
ఈ పరిణామంపై కంపెనీ తక్షణమే స్పందించింది. ఆన్లైన్లో ప్రచారంలో ఉన్న ఆరోపణలకు, కంపెనీ కార్యకలాపాలకు ఎలాంటి సంబంధం లేదని స్పష్టం చేసింది. ఉత్పత్తి, ఆర్డర్లు యథాతథంగా కొనసాగుతున్నాయని, కార్పొరేట్ పాలనలో ఎటువంటి ఇబ్బందులు లేవని ఒక ప్రకటనలో వెల్లడించింది. కంపెనీ వివరణ అనంతరం, జూన్ 9 నుంచి షేర్లు తిరిగి పుంజుకున్నాయి. ప్రస్తుతం కంపెనీ మార్కెట్ విలువ సుమారు 321 బిలియన్ యువాన్ల వద్ద స్థిరంగా కొనసాగుతోంది.
