ఐఐటీ మద్రాస్ అద్భుత ఆవిష్కరణ.. మానవ బ్రెయిన్స్టెమ్కు 3డీ అట్లాస్
- ఐఐటీ మద్రాస్ నుంచి ప్రపంచంలోనే అత్యంత స్పష్టమైన బ్రెయిన్స్టెమ్ 3డీ అట్లాస్
- 'యాంకర్' పేరుతో ఈ డిజిటల్ మ్యాప్ ఆవిష్కరణ
- మెదడు సంబంధిత వ్యాధులపై పరిశోధనలకు ఎంతగానో దోహదం
- బ్రిక్స్ న్యూరోసైన్స్ సదస్సులో అధికారికంగా విడుదల
- ప్రభుత్వ, ప్రైవేట్ భాగస్వామ్యంతో గొప్ప ఆవిష్కరణ అని ప్రశంసలు
మానవ శరీరంలో శ్వాస, హృదయ స్పందన, నిద్ర వంటి కీలక విధులను నియంత్రించే మెదడులోని ప్రధాన భాగాన్ని 'బ్రెయిన్స్టెమ్' అంటారు. ఈ ప్రాంతంలో తలెత్తే స్వల్ప సమస్యలైనా తీవ్ర పరిణామాలకు దారితీస్తాయి. ఐఐటీ మద్రాస్లోని సుధా గోపాలకృష్ణన్ బ్రెయిన్ సెంటర్ అభివృద్ధి చేసిన ఈ 'యాంకర్' అట్లాస్... పిండం దశ నుంచి బాల్యం, వయోజన దశల వరకు మెదడులో చోటుచేసుకునే మార్పులను వివరిస్తుంది. ఇందులో 200కు పైగా బ్రెయిన్స్టెమ్ న్యూక్లియై, ఫైబర్ ట్రాక్టులను అత్యంత స్పష్టంగా 3డీ రూపంలో పొందుపరిచారు.
జూన్ 5 నుంచి 7 వరకు ఐఐటీ మద్రాస్ ప్రాంగణంలో జరిగిన 3వ బ్రిక్స్ న్యూరోసైన్స్ సింపోజియంలో ఈ అట్లాస్ను అధికారికంగా విడుదల చేశారు. ప్రపంచవ్యాప్తంగా ఉన్న పరిశోధకులు, వైద్య నిపుణుల సౌకర్యార్థం దీనిని ఆన్లైన్ ప్లాట్ఫామ్లో డిజిటల్ రూపంలో ఉచితంగా అందుబాటులో ఉంచారు.
ఈ ఆవిష్కరణ న్యూరోబయాలజీ రంగంలో ఒక చారిత్రాత్మక విజయమని భారత ప్రభుత్వ ప్రధాన శాస్త్రీయ సలహాదారు ప్రొఫెసర్ అజయ్ కుమార్ సూద్ ప్రశంసించారు. ఎంఆర్ఐ, హిస్టాలజీ వంటి బహుళ ఫ్రేమ్వర్క్లను ఏకీకృతం చేస్తూ ఈ అట్లాస్ను రూపొందించినట్లు ఆయన తెలిపారు. ప్రభుత్వ సంస్థల సహకారం, ప్రైవేట్ భాగస్వామ్యం, దాతల తోడ్పాటు కలిసి పనిచేస్తే ఇటువంటి అద్భుతమైన ఆవిష్కరణలు సాధ్యమవుతాయని ఆయన కొనియాడారు. ఈ విజయంతో అంతర్జాతీయ న్యూరోసైన్స్ పరిశోధనలలో భారతదేశం ఒక కీలక స్థానాన్ని దక్కించుకుంది.
