అమెరికాలో కొండచిలువల వేట... చాలా ఫేమస్!

అమెరికాలోని ఫ్లోరిడా రాష్ట్రంలో బర్మీస్ కొండచిలువల వేట చాలా ప్రసిద్ధి చెందింది. స్థానిక జీవవైవిధ్యానికి పెను ముప్పుగా మారిన ఈ కొండచిలువలను ఏరివేసేందుకు అక్కడి ప్రభుత్వం, స్వచ్ఛంద సంస్థలు ప్రత్యేక కార్యక్రమాలు నిర్వహిస్తుంటాయి. తాజాగా, ఈ వేటలో ఓ సంస్థ సరికొత్త రికార్డు సృష్టించింది. కేవలం ఆరు నెలల్లోనే దాదాపు 4 టన్నుల బరువున్న కొండచిలువలను పట్టుకుంది.

2025 నవంబర్ నుంచి 2026 ఏప్రిల్ వరకు కోలియర్ కౌంటీలోని 200 చదరపు మైళ్ల విస్తీర్ణంలో ఈ ఆపరేషన్ నిర్వహించారు. 2013లో పైథాన్ ట్రాకింగ్ కార్యక్రమాన్ని ప్రారంభించినప్పటి నుంచి, ఇంత భారీ స్థాయిలో కొండచిలువలని పట్టుకోవడం ఇదే తొలిసారి.

ఈ విజయం వెనుక శాస్త్రవేత్తలు అనుసరించిన వినూత్న వ్యూహం ఉంది. 'స్కాట్ స్నేక్స్' పేరుతో 40 మగ కొండచిలువలకి రేడియో ట్రాన్స్‌మిటర్లను అమర్చి వాటిని అడవిలోకి వదిలారు. ఇవి జతకట్టే క్రమంలో ఆడ కొండచిలువల చెంతకు వెళ్లినప్పుడు, ఆ సంకేతాల ఆధారంగా అధికారులు వాటి ఆచూకీని గుర్తించారు. ఈ పద్ధతి ద్వారా గుడ్లు పెట్టడానికి సిద్ధంగా ఉన్న భారీ ఆడ కొండచిలువలని పట్టుకోగలిగారు. ఫలితంగా, సుమారు 4,100 కొండచిలువ గుడ్లు పర్యావరణంలో కలవకుండా నిరోధించగలిగారు.

ఈ సీజన్‌లో పట్టుబడిన వాటిలో అత్యంత భారీ కొండచిలువ 17 అడుగుల పొడవు, 153 పౌండ్ల బరువు ఉంది. "ఇది మా మొట్టమొదటి ఫోర్-టన్ రిమూవల్ సీజన్. మా స్కౌట్ పాములు, ఆడ కొండచిలువలు గుడ్లు పెట్టకముందే వాటిని గుర్తించడంలో అద్భుతంగా పనిచేశాయి" అని ఈ కార్యక్రమానికి నేతృత్వం వహిస్తున్న ఇయాన్ బార్టోజెక్ తెలిపారు. స్థానిక వన్యప్రాణులను రక్షించడంలో ఈ కార్యక్రమం అత్యంత కీలక పాత్ర పోషిస్తోంది.