రూ.4 కోట్లకు ఫ్లాట్ అమ్మేసిన టీమిండియా చీఫ్ సెలెక్టర్ అజిత్ అగార్కర్

టీమిండియా మాజీ క్రికెటర్, బీసీసీఐ చీఫ్ సెలక్టర్ అజిత్ అగార్కర్ ముంబైలోని తన నివాస అపార్ట్‌మెంట్‌ను విక్రయించాడు. నగరంలోని అత్యంత ఖరీదైన ప్రాంతాల్లో ఒకటైన బాంద్రా వెస్ట్‌లోని ఈ ఫ్లాట్‌ను అగార్కర్ రూ.4 కోట్లకు అమ్మినట్లు ప్రాపర్టీ రిజిస్ట్రేషన్ పత్రాల ద్వారా వెల్లడైంది.

బాంద్రా రెక్లమేషన్‌లోని జ్యువెల్ కో-ఆపరేటివ్ హౌసింగ్ సొసైటీలో ఈ అపార్ట్‌మెంట్ ఉంది. 1,229 చదరపు అడుగుల కార్పెట్ ఏరియాతో పాటు రెండు కార్ పార్కింగ్ స్లాట్లను కూడా కొనుగోలుదారుకు అప్పగించారు. ఈ లావాదేవీ ఏప్రిల్ 16, 2026న రిజిస్టర్ కాగా, దీని కోసం కొనుగోలుదారు రూ.24 లక్షల స్టాంప్ డ్యూటీ, రూ.30,000 రిజిస్ట్రేషన్ ఫీజు చెల్లించారు. ఈ లెక్కన చదరపు అడుగు ధర సుమారు రూ.32,547గా ఉంది.

ముంబైలో అత్యంత డిమాండ్ ఉన్న నివాస ప్రాంతాల్లో బాంద్రా వెస్ట్ ఒకటి. రోడ్డు, రైలు, మెట్రో మార్గాల ద్వారా బలమైన కనెక్టివిటీ, బాంద్రా కుర్లా కాంప్లెక్స్ వంటి వ్యాపార కేంద్రాలకు సమీపంలో ఉండటం ఇక్కడ ధరలు అధికంగా ఉండటానికి కారణం.

భారత్ తరఫున 1998లో అరంగేట్రం చేసిన అజిత్ అగార్కర్, ఫాస్ట్ బౌలింగ్ ఆల్‌రౌండర్‌గా అన్ని ఫార్మాట్లలో రాణించాడు. ప్రస్తుతం అగార్కర్ బీసీసీఐలో జాతీయ పురుషుల జట్టు చీఫ్ సెలెక్టర్ గా పరిపాలనా బాధ్యతలు నిర్వర్తిస్తున్నాడు. కాగా, గతవారమే బాలీవుడ్ నటుడు అక్షయ్ కుమార్ కూడా తన రెండు అపార్ట్‌మెంట్లను రూ.7.1 కోట్లకు అమ్మిన విషయం తెలిసిందే.