మమతా బెనర్జీకి దెబ్బ మీద దెబ్బ... టీఎంసీకి గుడ్ బై చెప్పిన మైనారిటీ నేత

పశ్చిమ బెంగాల్‌లో ఇటీవల జరిగిన అసెంబ్లీ ఎన్నికల్లో ఓటమి అనంతరం సంక్షోభంలో చిక్కుకున్న తృణమూల్ కాంగ్రెస్‌కు (టీఎంసీ) మరో భారీ షాక్ తగిలింది. పార్టీ జాతీయ ప్రధాన కార్యదర్శి అభిషేక్ బెనర్జీ నాయకత్వ శైలిపై తీవ్ర అసంతృప్తి వ్యక్తం చేస్తూ, రాష్ట్ర మైనారిటీ సెల్ కార్యదర్శి మహమ్మద్ అజ్మల్ సిద్ధిఖీ శనివారం పార్టీ ప్రాథమిక సభ్యత్వంతో పాటు అన్ని పదవులకు రాజీనామా చేశారు.

ఇటీవలే హజ్ యాత్ర ముగించుకుని వచ్చిన సిద్ధిఖీ, తన రాజీనామా లేఖను టీఎంసీ అధినేత్రి మమతా బెనర్జీకి పంపారు. పార్టీలో ప్రజాస్వామ్య స్ఫూర్తి కొరవడిందని, నిబద్ధత గల కార్యకర్తలను విస్మరిస్తున్నారని ఆయన ఆ లేఖలో ఆవేదన వ్యక్తం చేశారు. ఎంతో సుదీర్ఘంగా ఆలోచించిన తర్వాతే తాను ఈ నిర్ణయం తీసుకున్నట్లు ఆయన స్పష్టం చేశారు.

రాజీనామా అనంతరం సిద్ధిఖీ మాట్లాడుతూ అభిషేక్ బెనర్జీపై సంచలన ఆరోపణలు చేశారు. "ప్రస్తుతం పార్టీ కుప్పకూలుతోందంటే దానికి అభిషేక్ బెనర్జీయే ప్రధాన కారణం. ఆయన నియంతృత్వ ధోరణి, అధికార కేంద్రీకరణ వల్ల నిజాయతీ గల కార్యకర్తలకు అన్యాయం జరుగుతోంది. వారి అభిప్రాయాలకు పార్టీలో విలువ లేకుండా పోయింది" అని విమర్శించారు. పాత కేసులు, ఇతర ఒత్తిళ్ల కారణంగా పార్టీలో కొనసాగలేని పరిస్థితులు నెలకొన్నాయని, రాజీనామా తర్వాత ప్రస్తుతం తాను ఎంతో స్వేచ్ఛగా, ప్రశాంతంగా ఉన్నానని ఆయన పేర్కొన్నారు.

ఇటీవల జరిగిన ఎన్నికల్లో బీజేపీ చేతిలో టీఎంసీ పరాజయం పాలైన నేపథ్యంలో, పార్టీలో అంతర్గత విభేదాలు, అసమ్మతి స్వరాలు ఒక్కొక్కటిగా బయటపడుతున్నాయి. ఈ తరుణంలో మైనారిటీ విభాగంలో కీలక నేతగా ఉన్న సిద్ధిఖీ రాజీనామా చేయడం పార్టీకి మరింత నష్టం కలిగించే పరిణామంగా రాజకీయ విశ్లేషకులు భావిస్తున్నారు.