గుండె జబ్బులు, కొలెస్ట్రాల్‌కు చెక్.. వంట నూనెల మిక్సింగ్‌పై నిపుణుల కీలక సూచనలు!

ప్రపంచంలో ఏ ఒక్క వంట నూనె పోషకాల పరంగా సంపూర్ణమైనది కాదని నిపుణులు చెబుతున్నారు. కొన్ని నూనెల్లో మోనోఅన్‌శాచురేటెడ్ కొవ్వులు ఎక్కువగా ఉంటే మరికొన్నింటిలో పాలీఅన్‌శాచురేటెడ్ కొవ్వులు, యాంటీఆక్సిడెంట్లు పుష్కలంగా ఉంటాయి. అందుకే రైస్ బ్రాన్, సోయాబీన్, సన్‌ఫ్లవర్, పామాయిల్ వంటి నూనెలను శాస్త్రీయంగా మిక్స్ చేయడం ద్వారా శరీరానికి కావలసిన అన్ని రకాల మేలు చేసే కొవ్వులను సమతుల్యంగా (ఒమేగా-3, ఒమేగా-6 బ్యాలెన్స్) అందించవచ్చని ప్రపంచ ఆరోగ్య సంస్థ కూడా సిఫార్సు చేస్తోంది.

ఈ బ్లెండెడ్ నూనెలపై భారతదేశంలో జరిగిన ఓ ప్రత్యేక పరిశోధనలో ఆసక్తికర విషయాలు వెల్లడయ్యాయి. అధిక కొలెస్ట్రాల్, ట్రైగ్లిజరైడ్స్ సమస్యలతో బాధపడుతున్న 80 మంది పెద్దలపై మూడు నెలల పాటు జరిపిన అధ్యయనంలో.. వారు సాధారణ నూనెలకు బదులు బ్లెండెడ్ ఆయిల్స్ వాడటం వల్ల శరీరంలో చెడు కొలెస్ట్రాల్ (ఎల్‌డీఎల్) గణనీయంగా తగ్గినట్లు శాస్త్రవేత్తలు గుర్తించారు. అంతేకాకుండా శరీరంలో వచ్చే ఇన్‌ఫ్లమేషన్, ఆక్సీకరణ ఒత్తిడి కూడా తగ్గినట్లు తేలింది.

భారతీయ వంట పద్ధతుల్లో నూనెలను ఎక్కువ వేడి మీద మరిగిస్తూ ఉంటారు. ఇలాంటప్పుడు ఒమేగా కొవ్వులు ఎక్కువగా ఉండే నూనెలు హానికరమైన రసాయనాలుగా మారతాయి. కానీ, వేడిని తట్టుకునే పామాయిల్ లేదా రైస్ బ్రాన్ ఆయిల్‌ను ఇతర నూనెలతో కలపడం వల్ల నూనె స్థిరత్వం పెరిగి, వంటలు ఎక్కువ కాలం నిల్వ ఉంటాయి. దీనివల్ల గుండె జబ్బులకు కారణమయ్యే ప్రమాదకరమైన ‘ట్రాన్స్ ఫ్యాట్స్’ ఏర్పడే అవకాశం ఉండదు.

భారత్‌లో బ్లెండెడ్ నూనెల తయారీకి సంబంధించి ‘ఫుడ్ సేఫ్టీ అండ్ స్టాండర్డ్స్ అథారిటీ ఆఫ్ ఇండియా’ (ఎఫ్‌ఎస్‌ఎస్‌ఏఐ)ప్రత్యేక నిబంధనలను విధించింది. దీని ప్రకారం మిక్స్‌ చేసే నూనెల్లో ఏ ఒక్క నూనె అయినా కనీసం 20 శాతం పరిమాణంలో ఉండాలి. ఆధునిక జీవనశైలి వ్యాధులైన స్థూలకాయం, మధుమేహం, గుండె జబ్బుల బారిన పడకుండా ఉండాలంటే.. మన ఆహార అలవాట్లను మార్చుకోకుండానే వంట నూనెల మిక్సింగ్‌ ద్వారా కొవ్వుల నాణ్యతను పెంచుకోవడం ఓ స్మార్ట్, ఆరోగ్యకరమైన మార్గం.