సంప్రదాయం పేరుతో మారణహోమం.. ఒక్కరోజే 700కు పైగా తిమింగలాలు, డాల్ఫిన్ల వధ!

ఫారో దీవుల్లో సముద్ర జీవుల మారణహోమం తీవ్ర కలకలం రేపుతోంది. మే 27న ఒకేరోజు 700కు పైగా పైలట్ వేల్స్, డాల్ఫిన్లను అత్యంత దారుణంగా వేటాడారు. ఈ ఘటనతో సముద్ర తీర జలాలు రక్తసిక్తమయ్యాయి. ఈ ప్రాంతంలో ఇదొక సంప్రదాయ వేట. దీంతో ఈ వేటపై మరోసారి అంతర్జాతీయంగా తీవ్ర వ్యతిరేకత వ్యక్తమవుతోంది.

సీ షెపర్డ్ కన్జర్వేషన్ సొసైటీ నివేదికల ప్రకారం, మూడు వేర్వేరు ప్రాంతాల్లో జరిగిన ఈ వేటలో మొత్తం 700కు పైగా తిమింగలాలు, డాల్ఫిన్లను వధించారు. రాజధాని టోర్షావ్న్‌లోని సాండాగెర్డి బేలో 402 పైలట్ వేల్స్, నాలుగు బాటిల్‌నోస్ డాల్ఫిన్లను వేటాడారు. అదే రోజు స్కాలాఫ్జోర్డుర్‌లో 168 అట్లాంటిక్ వైట్-సైడెడ్ డాల్ఫిన్లను, హాల్విక్‌లో 132 వైట్ సైడెడ్ డాల్ఫిన్లను చంపేశారు. గత ఏడాది మొత్తం చంపిన జీవుల సంఖ్యలో మూడింట రెండొంతుల కంటే ఎక్కువ ఈ ఒక్కరోజే వేటాడటం ఆందోళన కలిగిస్తోంది.

నార్త్ అట్లాంటిక్ సముద్రంలోని ఫారో దీవుల్లో శతాబ్దాలుగా వస్తున్న ఈ సంప్రదాయ వేటను నిషేధించాలనే డిమాండ్లు వినిపిస్తున్నాయి. పడవలను ఉపయోగించి తిమింగలాలు, డాల్ఫిన్లను తీరానికి మళ్లించి, వాటిని చంపి మాంసాన్ని స్థానికులు పంచుకుంటారు. అయితే, ఇటీవలే ఫారో పార్లమెంటు జంతు సంరక్షణ చట్టం నుంచి తిమింగలాలు, డాల్ఫిన్లను మినహాయిస్తూ ఏకగ్రీవంగా తీర్మానం చేసింది. ఈ నిర్ణయం తీసుకున్న కొద్ది రోజులకే ఇంత పెద్ద ఎత్తున వేట జరగడం గమనార్హం.

ఓ సమయంలో వాటిని చంపేందుకు ఉపయోగించే ఆయుధాలు కొరత ఏర్పడటంతో కొక్కేలు, కత్తులు ఉపయోగించి వాటి శరీరాలను చీల్చారు. దీంతో అవి ఒడ్డున గిలగిల కొట్టుకుంటూ మృతి చెందాయి. సీ షెఫర్డ్‌లోని ఫారో దీవుల డైరెక్టర్ వాలంటీనా క్రాస్ట్ ఈ వేటను ఖండించారు. జంతువులను ఇంత క్రూరంగా హింసించి చంపడం సరికాదని అన్నారు. ఈ సంప్రదాయాన్ని నిషేదించాలని డిమాండ్ చేశారు.