ఆఫ్ఘనిస్థాన్ తో ఏకైక టెస్ట్... ప్రాక్టీస్ ప్రారంభించిన టీమిండియా

అఫ్గానిస్థాన్‌తో జరగబోయే ఏకైక టెస్టు మ్యాచ్ కోసం శుభ్‌మన్ గిల్ సారథ్యంలోని భారత క్రికెట్ జట్టు సన్నాహాలు ప్రారంభించింది. న్యూ చండీగఢ్‌లోని ముల్లన్‌పూర్‌లో ఉన్న మహారాజా యదవీంద్ర సింగ్ అంతర్జాతీయ క్రికెట్ స్టేడియంలో బుధవారం నుంచి జట్టు ముమ్మరంగా ప్రాక్టీస్ చేస్తోంది. జూన్ 6వ తేదీన ఈ చారిత్రక టెస్టు మ్యాచ్ ప్రారంభం కానుంది.

2026 ఐపీఎల్ సీజన్ ముగిసిన తర్వాత భారత జట్టు ఆడుతున్న తొలి రెడ్ బాల్ మ్యాచ్ ఇదే. మంగళవారం నగరానికి చేరుకున్న ఆటగాళ్లు, కెప్టెన్ గిల్ నాయకత్వంలో సాధన మొదలుపెట్టారు. తొలిరోజు ప్రాక్టీస్ సెషన్‌లో వైస్ కెప్టెన్ కేఎల్ రాహుల్, రిషభ్ పంత్, యశస్వి జైస్వాల్, నితీశ్ కుమార్ రెడ్డి వంటి కీలక ఆటగాళ్లు పాల్గొన్నారు. స్పిన్ బౌలింగ్ కోచ్ సాయిరాజ్ బహుతులే కూడా జట్టు సహాయక సిబ్బందితో కలిశారు.

ఈ మ్యాచ్ కోసం ప్రకటించిన భారత జట్టులో అనుభవజ్ఞులతో పాటు పలువురు యువ ఆటగాళ్లకు చోటు దక్కింది. ఈ స్టేడియంలో ఇదే తొలి టెస్టు మ్యాచ్ కావడంతో స్థానికంగా ఆసక్తి నెలకొంది. ఈ మ్యాచ్ టికెట్ల ధరలు రూ.250 నుంచి ప్రారంభమవుతున్నాయి. ఈ ఏడాది చివర్లో శ్రీలంక, న్యూజిలాండ్ పర్యటనలకు ముందు ఈ మ్యాచ్ భారత జట్టుకు సన్నాహకంగా ఉపయోగపడనుంది. 2018 తర్వాత భారత గడ్డపై అఫ్గానిస్థాన్ ఆడబోతున్న తొలి టెస్టు కూడా ఇదే కావడం విశేషం.