వామ్మో, కుక్క సైజులో తేలు... ఇప్పుడు కాదులెండి!

భూమిపై దాదాపు 415 మిలియన్ సంవత్సరాల కిందట కుక్క సైజులో ఉండే భారీ తేళ్లు సంచరించాయని శాస్త్రవేత్తలు తాజాగా కనుగొన్నారు. మీటరు పొడవు పెరిగే ఈ రాకాసి తేలుకు 'ప్రీయాక్టురస్ గైగాస్' అని పేరు పెట్టారు. డైనోసార్లు, అడవులు కూడా ఏర్పడక ముందు కాలంలో ఇవి జీవించాయని పరిశోధకులు తెలిపారు.

ఆశ్చర్యకరమైన విషయం ఏంటంటే, ఈ తేలుకు సంబంధించిన శిలాజాలను 19వ శతాబ్దంలోనే కనుగొన్నారు. అయితే, శిలాజాలు అసంపూర్ణంగా ఉండటంతో వాటిని ఓ భారీ సముద్ర జీవిగా పొరబడ్డారు. దాదాపు 150 ఏళ్లకు పైగా లండన్‌లోని నేచురల్ హిస్టరీ మ్యూజియం వంటి సంస్థల్లో ఈ శిలాజాలు మరో జీవి పేరుతోనే ఉండిపోయాయి. ఇటీవల పేలెంటియాలజిస్టులు ఆధునిక సాంకేతికతతో వీటిని తిరిగి పరిశీలించగా, అది తేలు అని నిర్ధారణ అయింది.

ఈ భారీ తేలు 16 సెంటీమీటర్లకు పైగా పొడవున్న బలమైన కొండితో ఉండేది. బ్రిటన్‌లో చిత్తడి నేలలు, నదీ వ్యవస్థలలో ఇది నివసించేది. నీటిలో, నేలపైనా సంచరించే సామర్థ్యం దీనికి ఉందని శాస్త్రవేత్తలు భావిస్తున్నారు. ఆ కాలంలో దీనికి పోటీ ఇచ్చే జీవులు పెద్దగా లేకపోవడంతో, చిన్న జీవులను, చేపలను వేటాడే అగ్రశ్రేణి మాంసాహారిగా ఇది జీవించింది.

మ్యూజియంలలోని పాత శిలాజాలను కొత్త పద్ధతుల్లో విశ్లేషించడం ద్వారా ప్రాచీన జీవుల గురించి ఎన్నో ఆసక్తికర విషయాలు తెలుసుకోవచ్చని ఈ అధ్యయనం నిరూపించింది. ఈ పరిశోధన వివరాలు 'పేలెంటియాలజీ' అనే అంతర్జాతీయ జర్నల్‌లో ప్రచురితమయ్యాయి.