ఆంధ్ర నేతల విగ్రహాలు పగలగొడితే సీఎం అవుతారా?: కవితపై బీజేపీ నేత విష్ణువర్ధన్ రెడ్డి ఫైర్

తెలంగాణలో ఉన్న ఆంధ్ర నాయకుల విగ్రహాలను పగలగొడతామంటూ తెలంగాణ రక్షణ సమితి పార్టీ చీఫ్ కల్వకుంట్ల కవిత చేసిన వివాదాస్పద వ్యాఖ్యలపై ఆంధ్రప్రదేశ్ బీజేపీ సీనియర్ నాయకుడు విష్ణువర్ధన్ రెడ్డి తీవ్రస్థాయిలో మండిపడ్డారు. టీఆర్ఎస్ అధికారంలోకి వస్తే తెలంగాణలోని ఆంధ్ర నేతల విగ్రహాలను ధ్వంసం చేసి, వాటిని పార్సిళ్లుగా ఆంధ్రాకు పంపుతామంటూ కవిత చేసిన వ్యాఖ్యలపై ఆయన ఘాటుగా స్పందించారు.

"కవిత గారూ.. విగ్రహాలు పగలగొడతాం అని మాట్లాడితే మీరు ముఖ్యమంత్రి అవుతారా? ఇంకా ఎంతకాలం ఇలాంటి సెంటిమెంట్ రాజకీయాలు చేస్తారు?" అంటూ విష్ణువర్ధన్ రెడ్డి సూటిగా ప్రశ్నించారు. గతంలో బీఆర్ఎస్ నేత బాల్క సుమన్ ఇలాంటి ఉద్రేకపూరిత వ్యాఖ్యలు చేయడం వల్లే కేసులు, జైలు శిక్ష అనుభవించాల్సి వచ్చిందని ఆయన గుర్తుచేశారు. రెండు తెలుగు రాష్ట్రాల మధ్య ద్వేషాన్ని, ఉద్రిక్తతలను పెంచేలా మాట్లాడుతున్న ఇలాంటి వారిపై ఎందుకు చర్యలు తీసుకోవడం లేదని ఆయన ప్రశ్నించారు.

కవిత చేసిన ఈ వ్యాఖ్యలపై తెలంగాణ బీజేపీ నేతలతో పాటు ముఖ్యమంత్రి రేవంత్ రెడ్డి కూడా గట్టిగా స్పందించాలని విష్ణువర్ధన్ రెడ్డి డిమాండ్ చేశారు. చట్టం అందరికీ సమానంగా ఉండాలని, రెండు రాష్ట్రాల మధ్య సామరస్యాన్ని దెబ్బతీసేలా ప్రాంతీయ విద్వేషాలను రెచ్చగొట్టే రాజకీయాలను ఎట్టిపరిస్థితుల్లోనూ సహించకూడదని ఆయన హెచ్చరించారు.