'పెద్ది' థియేటర్ల వివాదానికి శుభం కార్డు... దిల్ రాజు థియేటర్లలోనూ చరణ్ సినిమా

మెగా ప‌వ‌ర్ స్టార్‌ రామ్ చరణ్ హీరోగా, బుచ్చిబాబు సనా దర్శకత్వంలో ప్రతిష్ఠాత్మకంగా తెరకెక్కిన‌ 'పెద్ది' చిత్రం విడుదలపై నెలకొన్న ఉత్కంఠకు తెరపడింది. గత కొన్ని రోజులుగా తెలుగు సినీ పరిశ్రమలో హాట్ టాపిక్‌గా మారిన థియేటర్ల వివాదం పరిష్కారమవడంతో సినిమా విడుదలకు అన్ని అడ్డంకులు తొలగిపోయాయి. ముఖ్యంగా నైజాం ఏరియాలో ప్రముఖ నిర్మాత దిల్ రాజుకు చెందిన ఎస్వీసీ థియేటర్ల శ్రేణిలో 'పెద్ది' విడుదలవుతుందా? లేదా? అనే సందేహాలకు స్పష్టత వచ్చింది.

నిర్మాతలు, ఎగ్జిబిటర్ల మధ్య రెంటల్, పర్సెంటేజ్ పద్ధతులపై ఉన్న విభేదాలు, అలాగే ఎస్వీసీ డిస్ట్రిబ్యూషన్, మైత్రి డిస్ట్రిబ్యూషన్ మధ్య ఉన్న పోటీ వాతావరణం 'పెద్ది' విడుదలపై ప్రభావం చూపుతుందని ప్రచారం జరిగింది. నిన్న‌ విడుదల చేసిన నైజాం థియేటర్ల తొలి జాబితాలో ఎస్వీసీ థియేటర్ల పేర్లు లేకపోవడంతో ఈ ఊహాగానాలకు మరింత బలం చేకూరింది. అయితే, తాజాగా ఇరు వర్గాల మధ్య జరిగిన చర్చలు ఫలించడంతో వివాదం సుఖాంతమైంది.

ఈ ఒప్పందంతో నైజాం ప్రాంతంలోని ఎస్వీసీ సంస్థకు చెందిన అన్ని ప్రధాన థియేటర్లలోనూ 'పెద్ది' విడుదల ఖాయమైంది. ముఖ్యంగా హైదరాబాద్‌లోని ఆర్టీసీ క్రాస్ రోడ్స్‌లో సినీ అభిమానులకు ప్రత్యేక ఆకర్షణగా నిలిచే సుదర్శన్, దేవి థియేటర్ కాంప్లెక్స్‌లలో కూడా 'పెద్ది' ప్రదర్శితం కానుంది. దీంతో రామ్ చరణ్ అభిమానులు భారీ ఊరట చెందారు. మైత్రి మూవీ మేకర్స్ సంస్థ నిర్మించిన చిత్రాల్లో నైజాంలో ఇంత భారీ స్థాయిలో విడుదల అవుతున్న సినిమా ఇదేనని ట్రేడ్ వర్గాలు విశ్లేషిస్తున్నాయి.

మరోవైపు తెలంగాణలో టికెట్ ధరల పెంపుదల, అదనపు షోల ప్రదర్శనకు అనుమతులు కోరుతూ నిర్మాతలు ప్రభుత్వాన్ని ఆశ్రయించినట్లు తెలుస్తోంది. దీనిపై ప్రభుత్వం సానుకూలంగా స్పందిస్తే, సినిమా తొలి వారం వసూళ్లపై అది గణనీయమైన ప్రభావం చూపే అవకాశం ఉంది. ఈ ఏడాది వేసవిలో పెద్ద సినిమాల సందడి లేకపోవడంతో నిరాశలో ఉన్న బాక్సాఫీస్‌కు 'పెద్ది' చిత్రం భారీ అంచనాలతో కొత్త ఊపు తెస్తుందని ప్రేక్షకులు ఆసక్తిగా ఎదురుచూస్తున్నారు.