పెద్ద మనసు చాటుకున్న హీరో సూర్య.. 'కరుప్పు' టీమ్‌కు ఖరీదైన కార్లు బ‌హుమ‌తి

తన సినిమా విజయంలో భాగమైన సాంకేతిక నిపుణులపై బహుమతుల వర్షం కురిపించడంలో హీరో సూర్య ఎప్పుడూ ముందుంటారు. తాజాగా తన బ్లాక్‌బస్టర్ చిత్రం 'కరుప్పు' సాధించిన భారీ విజయం సందర్భంగా చిత్ర బృందంలోని కీలక సభ్యులకు ఖరీదైన కార్లను బహుమతిగా ఇచ్చి మరోసారి తన పెద్ద మనసును చాటుకున్నారు. ఈ చిత్రం ప్రపంచవ్యాప్తంగా రూ. 300 కోట్లకు పైగా వసూళ్లు సాధించి ఈ ఏడాది తమిళంలో అతిపెద్ద హిట్‌లలో ఒకటిగా నిలిచింది.

ఈ విజయానికి కృతజ్ఞతగా, సినిమాటోగ్రాఫర్ జి.కె. విష్ణుకు సూర్య ఖరీదైన మహీంద్రా బీఈ 6 బ్యాట్‌మ్యాన్ ఎడిషన్ ఎలక్ట్రిక్ కారును బహుమతిగా అందించారు. సుమారు రూ. 30-40 లక్షల విలువైన ఈ ప్రత్యేకమైన కారును అందుకున్న విష్ణు, తన ఆనందాన్ని సోషల్ మీడియాలో పంచుకున్నారు. కారుతో దిగిన ఫొటోను పోస్ట్ చేస్తూ.. "ఇది దేవుడి ఆశీర్వాదం! థ్యాంక్యూ సూర్య సర్. మీది చాలా పెద్ద మనసు!!!" అని రాసుకొచ్చారు. సినిమా అద్భుతమైన విజువల్స్‌తో ప్రేక్షకులను కట్టిపడేయడంలో విష్ణు పనితనం కీలక పాత్ర పోషించింది.

సూర్య తన ప్రశంసలను కేవలం సినిమాటోగ్రాఫర్‌కే పరిమితం చేయలేదు. 'కరుప్పు' సినిమాకు అద్భుతమైన నేపథ్య సంగీతం, చార్ట్‌బస్టర్ పాటలు అందించిన సంగీత దర్శకుడు సాయి అభ్యంక్కర్‌కు కూడా ఇదే మోడల్ కారును బహుమతిగా ఇచ్చారు. వీరితో పాటు ఎడిటర్ ఆర్ కలైవానన్‌కు కూడా సూర్య కారు బహుమతిగా ఇచ్చినట్లు స‌మాచారం. మే 15న విడుదలైన ఈ ఫాంటసీ యాక్షన్ డ్రామా, తన కథనంతో పాటు సాంకేతిక విలువలతోనూ విమర్శకుల ప్రశంసలు అందుకుంది.

విజయాన్ని తన సహచరులతో పంచుకునే సూర్య మంచి మనసు గురించి చిత్ర పరిశ్రమలో అందరికీ తెలిసిందే. గతంలో కూడా ఆయన పలుమార్లు తన చిత్ర బృందానికి ఇలాంటి విలువైన బహుమతులు అందించారు. సూర్య ఔదార్యంపై అభిమానులు, సినీ ప్రముఖులు ప్రశంసలు కురిపిస్తున్నారు. నటుడు ఆర్జే బాలాజీ వంటి వారు సూర్య పెద్ద మనసును కొనియాడారు. కష్టపడి పనిచేసిన వారికి తగిన గుర్తింపు ఇవ్వడం ద్వారా సూర్య గొప్ప నాయకత్వ లక్షణాలను ప్రదర్శిస్తున్నారని ఇండస్ట్రీ వర్గాలు అభినందిస్తున్నాయి.