రూ. 2 లక్షల బ్యాగ్‌తో కోతి పరార్.. ఆ తర్వాత సీన్ కట్ చేస్తే!

ఉత్తరప్రదేశ్‌లోని బులంద్‌షహర్ జిల్లా కోర్టు ప్రాంగణంలో ఒక విచిత్రమైన సంఘటన అందరినీ ఆశ్చర్యపరిచింది. ఓ వ్యక్తి నుంచి సుమారు రూ. 2 లక్షల నగదు ఉన్న బ్యాగ్‌ను ఓ కోతి లాక్కెళ్లి, చెట్టుపైకి ఎక్కి నోట్లను కిందకు వెదజల్లింది. దీంతో అక్కడ కాసేపు గందరగోళం నెలకొంది.

అస‌లేం జ‌రిగిందంటే..!
కచేరీ రోడ్డులోని స్టాంప్ వెండర్ కార్యాలయం వద్ద ఈ ఘటన చోటుచేసుకుంది. ఓ లాయర్ తన సహోద్యోగి రవీంద్ర లోధి (రాజు)ని ప్రాపర్టీ రిజిస్ట్రేషన్ కోసం స్టాంపులు కొనేందుకు పంపించారు. రాజు డబ్బుల బ్యాగ్‌తో వెళ్తుండగా, ఓ కోతి అకస్మాత్తుగా ఆ బ్యాగ్‌ను లాక్కొని సమీపంలోని వేప చెట్టుపైకి ఎక్కింది.

చెట్టు కొమ్మపై కూర్చున్న కోతి, బ్యాగ్‌ను చించి అందులో ఉన్న రూ. 500 నోట్ల కట్టలను కిందకు విసిరేయడం ప్రారంభించింది. దీంతో అక్కడ 'డబ్బుల వర్షం' కురుస్తున్నట్టు కనిపించింది. ఈ దృశ్యాన్ని చూసిన జనం, కింద పడుతున్న నోట్లను ఏరుకునేందుకు ఎగబడ్డారు. ఈ వింత ఘటనకు సంబంధించిన వీడియోలు సోషల్ మీడియాలో వేగంగా వైరల్ అయ్యాయి.

సమాచారం అందుకున్న స్థానిక లాయర్లు, పోలీసులు వెంటనే అక్కడికి చేరుకున్నారు. దాదాపు రూ. 1.91 లక్షల నగదును తిరిగి స్వాధీనం చేసుకుని యజమానికి అప్పగించినట్లు తెలిసింది. దీంతో పెద్దగా నష్టం జరగలేదని సమాచారం. కోతి కాసేపటికి ఖాళీ బ్యాగ్‌ను అక్కడే వదిలేసి వెళ్లిపోయింది.

ఈ ఘటనలో ఎవరికీ గాయాలు కాలేదు. ఆహారం కోసమే కోతి బ్యాగ్‌ను లాక్కెళ్లి ఉంటుందని అధికారులు భావిస్తున్నారు. ఉత్తరప్రదేశ్‌లోని పలు ప్రాంతాల్లో కోతుల బెడద సాధారణమే కాగా, ఈ సంఘటన పట్టణ ప్రాంతాల్లో వన్యప్రాణుల నిర్వహణపై మరోసారి చర్చను రేకెత్తించింది.