సూర్యవంశీ మళ్లీ సెంచరీ మిస్.. ఫెరీరా సిక్సర్ల వర్షం.. రాజస్థాన్ భారీ స్కోరు

ఐపీఎల్ 2026 సీజన్‌లో అత్యంత కీలకమైన క్వాలిఫైయర్ 2 మ్యాచ్‌లో గుజరాత్ టైటాన్స్‌కు రాజస్థాన్ రాయల్స్ భారీ లక్ష్యాన్ని నిర్దేశించింది. చండీగఢ్‌లో జరుగుతున్న ఈ పోరులో తొలుత బ్యాటింగ్ చేసిన రాజస్థాన్, నిర్ణీత 20 ఓవర్లలో 6 వికెట్ల నష్టానికి 214 పరుగుల భారీ స్కోరు చేసింది. వైభవ్ సూర్యవంశీ (47 బంతుల్లో 96; 8 ఫోర్లు, 7 సిక్సర్లు) విధ్వంసకర ఇన్నింగ్స్‌కు తోడు రవీంద్ర జడేజా (35 బంతుల్లో 45 నాటౌట్), డొనోవన్ ఫెరీరా (11 బంతుల్లో 38 నాటౌట్; 2 ఫోర్లు, 4 సిక్సర్లు) మెరుపులు మెరిపించడంతో గుజరాత్ ముందు కొండంత లక్ష్యం నిలిచింది.

యువ సంచలనం వైభవ్ సూర్యవంశీ మరోసారి తృటిలో శతకం చేజార్చుకున్నాడు. అయితే, ఆఖర్లో డొనోవన్ ఫెరీరా సృష్టించిన విధ్వంసంతో రాజస్థాన్ రాయల్స్ భారీ స్కోరును నమోదు చేసింది. గుజరాత్ టైటాన్స్‌తో జరుగుతున్న కీలక మ్యాచ్‌లో రాజస్థాన్ బ్యాటర్లు అద్భుత ప్రదర్శన కనబరిచారు. ముఖ్యంగా సూర్యవంశీ పరిణితి చెందిన ఆటతీరుతో ఆకట్టుకోగా, ఫెరీరా తన పవర్‌ హిట్టింగ్‌తో గుజరాత్ బౌలర్లకు చుక్కలు చూపించాడు.

ఈ మ్యాచ్‌లో టాస్ గెలిచి బ్యాటింగ్ ఎంచుకున్న రాజస్థాన్‌కు ఆరంభంలోనే గట్టి ఎదురుదెబ్బలు తగిలాయి. ఇన్నింగ్స్ మొదటి ఓవర్‌లోనే మహమ్మద్ సిరాజ్ బౌలింగ్‌లో యశస్వి జైస్వాల్ (1) ఔట్ కాగా, ఆ తర్వాత కగిసో రబాడా బౌలింగ్‌లో ధ్రువ్ జురెల్ (7) కూడా పెవిలియన్ చేరాడు. దీంతో రాజస్థాన్ 13 పరుగులకే 2 వికెట్లు కోల్పోయి కష్టాల్లో పడింది. ఈ దశలో వైభవ్ సూర్యవంశీ, ప్రమోషన్‌పై నాలుగో స్థానంలో వచ్చిన రవీంద్ర జడేజాతో కలిసి ఇన్నింగ్స్‌ను చక్కదిద్దాడు.

సూర్యవంశీ ఒకవైపు ఆచితూచి ఆడుతూనే, చెత్త బంతులను బౌండరీలకు తరలించాడు. సిరాజ్, రబాడా వంటి ప్రమాదకర బౌలర్లను సైతం సమర్థవంతంగా ఎదుర్కొని పవర్‌ప్లేలో స్కోరు బోర్డును ముందుకు నడిపించాడు. ఈ క్రమంలో జడేజా కూడా దూకుడుగా ఆడటంతో రాజస్థాన్ తేరుకుంది. 

అద్భుతంగా ఆడుతూ శతకం దిశగా సాగిన సూర్యవంశీ దురదృష్టవశాత్తూ 96 పరుగుల వద్ద ఔటయ్యాడు. అతను సెంచరీ పూర్తి చేసుకోలేకపోయినా, జట్టుకు పటిష్టమైన పునాది వేశాడు. ఆ తర్వాత అసలు సిసలైన విధ్వంసం మొదలైంది. చివర్లో క్రీజులోకి వచ్చిన డొనోవన్ ఫెరీరా ఆకాశమే హద్దుగా చెలరేగాడు. ముఖ్యంగా ప్రపంచ స్థాయి స్పిన్నర్ రషీద్ ఖాన్ వేసిన 19వ ఓవర్‌లో ఫెరీరా విశ్వరూపం ప్రదర్శించాడు. ఆ ఓవర్లో మొత్తం నాలుగు భారీ సిక్సర్లు, ఒక డబుల్‌తో ఏకంగా 26 పరుగులు పిండుకున్నాడు. ఈ ఒక్క ఓవరే మ్యాచ్ స్వరూపాన్ని మార్చేసింది. ఫెరీరా మెరుపులతో రాజస్థాన్ రాయల్స్ నిర్ణీత ఓవర్లలో భారీ స్కోరు సాధించింది. 

గుజరాత్ బౌలర్లలో జాసన్ హోల్డర్ 4 ఓవర్లలో 27 పరుగులిచ్చి 2 వికెట్లు, కగిసో రబడ 35 పరుగులిచ్చి 2 వికెట్లు తీసి కాస్త ఫరవాలేదనిపించారు. అయితే, కీలక బౌలర్ రషీద్ ఖాన్ 2 ఓవర్లలోనే 45 పరుగులు సమర్పించి తీవ్రంగా నిరాశపరిచాడు. ఈ మ్యాచ్‌లో గెలిచి ఫైనల్ బెర్త్ ఖరారు చేసుకోవాలంటే గుజరాత్ టైటాన్స్ ఈ భారీ లక్ష్యాన్ని ఛేదించాల్సి ఉంటుంది.