చివరి గంటలో అమ్మకాల సునామీ.. కుప్పకూలిన స్టాక్ మార్కెట్లు!

దేశీయ స్టాక్ మార్కెట్లు శుక్రవారం భారీ నష్టాలతో ముగిశాయి. రోజంతా తీవ్ర ఒడిదొడుకులకు లోనైన సూచీలు, ట్రేడింగ్ చివరి గంటలో అమ్మకాల సునామీతో కుప్పకూలాయి. అమెరికా-ఇరాన్ మధ్య ఒప్పందం కుదరవచ్చన్న వార్తల నేపథ్యంలో నెలకొన్న అనిశ్చితి, ఇన్వెస్టర్ల సెంటిమెంట్‌ను దెబ్బతీసింది. దీనికి తోడు రుతుపవనాలపై వాతావరణ శాఖ (ఐఎండీ) అంచనాలు కూడా అమ్మకాలకు ఆజ్యం పోశాయి.

ట్రేడింగ్ ముగిసే సమయానికి సెన్సెక్స్ 1,092.06 పాయింట్లు నష్టపోయి 74,775.74 వద్ద స్థిరపడింది. నిఫ్టీ 359.40 పాయింట్లు పతనమై 23,547.75 వద్ద ముగిసింది. ట్రేడింగ్‌లో ఒక దశలో నిఫ్టీ 24,002 పాయింట్ల గరిష్ఠ స్థాయిని తాకినా, చివరికి 23,484 కనిష్ఠ స్థాయికి పడిపోయింది. సెన్సెక్స్ కూడా 76,220 గరిష్ఠాన్ని చూసి, ఆ తర్వాత 74,589 స్థాయికి జారుకుంది.

రిలయన్స్ ఇండస్ట్రీస్ 2.18 శాతం, ఐటీసీ 1.71 శాతం మేర నష్టపోవడం మార్కెట్ పతనాన్ని మరింత వేగవంతం చేసింది. అయితే, ఈ ప్రతికూల మార్కెట్‌లోనూ ఐటీ రంగ షేర్లు రాణించాయి. నిఫ్టీ ఐటీ ఇండెక్స్ 0.60 శాతం లాభపడింది. అమెరికా టెక్ స్టాక్స్‌లో ర్యాలీ, రూపాయి బలహీనపడటం ఐటీ కంపెనీలకు కలిసొచ్చింది. బ్రాడర్ మార్కెట్లలో మిడ్‌క్యాప్ ఇండెక్స్ 1.33 శాతం, స్మాల్‌క్యాప్ ఇండెక్స్ 0.85 శాతం మేర నష్టపోయాయి.

టెక్నికల్ నిపుణుల అంచనా ప్రకారం, నిఫ్టీ 23,500 స్థాయిని నిలబెట్టుకోలేకపోతే 23,300-23,200 జోన్‌కు పడిపోయే ప్రమాదం ఉంది. పైకి వెళ్లాలంటే 23,750-23,800 స్థాయిని అధిగమించాల్సి ఉంటుందని విశ్లేషకులు చెబుతున్నారు.