సోషల్ మీడియా పరిచయం.. బాలికపై అత్యాచారానికి దారితీసిన వైనం

కడప జిల్లాలో దారుణ ఘటన వెలుగులోకి వచ్చింది. సోషల్ మీడియా ద్వారా పరిచయమైన యువకుడు, పదో తరగతి పూర్తి చేసిన ఓ మైనర్ బాలికపై అత్యాచారానికి పాల్పడ్డాడు. ఈ ఘటనలో తీవ్రంగా గాయపడిన బాలిక ప్రస్తుతం కడప రిమ్స్ ఆసుపత్రిలో చికిత్స పొందుతోంది. బాధితురాలి తల్లిదండ్రుల ఫిర్యాదు మేరకు నిందితుడిపై పోక్సో చట్టం కింద కేసు నమోదు చేసిన పోలీసులు, అతని కోసం గాలిస్తున్నారు.

వివరాల్లోకి వెళితే.. దువ్వూరు మండలానికి చెందిన 15 ఏళ్ల బాలికకు, వల్లూరు మండలం కోట్లూరు గ్రామానికి చెందిన ఈశ్వర్ (19) అనే యువకుడితో సోషల్ మీడియాలో పరిచయం ఏర్పడింది. ప్రేమ పేరుతో బాలికను మభ్యపెట్టిన నిందితుడు, ఆమెను తన మోటార్‌సైకిల్‌పై ఖాజీపేటలోని ఓ లాడ్జికి తీసుకెళ్లాడు. అక్కడ బాలికపై అత్యాచారానికి పాల్పడ్డాడు. ఈ దాడిలో బాలికకు తీవ్ర రక్తస్రావం అయినప్పటికీ, నిందితుడు కనికరించలేదు.

అనంతరం బాలికను ఆమె ఇంటి సమీపంలో వదిలిపెట్టి ఈశ్వర్ పరారయ్యాడు. తీవ్ర రక్తస్రావంతో బాధపడుతూ ఇంటికి చేరుకున్న కుమార్తెను చూసి కుటుంబ సభ్యులు భయాందోళనకు గురయ్యారు. వెంటనే ఆమెను ప్రొద్దుటూరు ప్రభుత్వ ఆసుపత్రికి, ఆపై మెరుగైన వైద్యం కోసం కడప రిమ్స్‌కు తరలించారు.

మంగళవారం బాధితురాలి తల్లి ఇచ్చిన ఫిర్యాదు మేరకు దువ్వూరు పోలీసులు కేసు నమోదు చేశారు. నిందితుడు ఈశ్వర్‌పై పోక్సో చట్టం కింద కేసు నమోదు చేసి, దర్యాప్తు ప్రారంభించారు. పరారీలో ఉన్న నిందితుడిని పట్టుకునేందుకు పోలీసులు ప్రత్యేక బృందాలతో గాలింపు చర్యలు చేపట్టారు.