యూకే వెళ్లాక తెలిసొచ్చింది.. భారత్‌లోని 11 సౌకర్యాలపై యువతి పోస్ట్ వైరల్

సామాజిక మాధ్యమాల్లో ఎప్పుడు ఏది వైరల్ అవుతుందో చెప్పలేం. కొన్నిసార్లు ఒక చిన్న వీడియో కూడా ఎంతోమంది మనసులోని మాటను ప్రతిబింబిస్తుంది. సరిగ్గా అలాంటి ఓ వీడియో ఇప్పుడు ఇంటర్నెట్‌లో చక్కర్లు కొడుతోంది. యూకేలో నివసిస్తున్న విధి లీలా అనే భారత యువతి, భారత్‌లో మనం చాలా తేలికగా తీసుకునే రోజువారీ సౌకర్యాలు విదేశాల్లో ఎంతటి విలాసవంతమైనవో వివరిస్తూ ఓ వీడియోను పోస్ట్ చేశారు. ఈ వీడియోకు నెటిజన్ల నుంచి, ముఖ్యంగా ఎన్నారైల నుంచి విశేష స్పందన వస్తోంది.

విధి లీలా తన వీడియోలో మొత్తం 11 అంశాలను ప్రస్తావించారు. భారత్‌లో ఆహారం, కిరాణా సరుకులు, మందులు వంటివి క్షణాల్లో ఇంటికి డెలివరీ కావడం, అమెజాన్ వంటి వాటిలో రిటర్న్ కూడా ఇంటి నుంచే పికప్ చేసుకోవడం చాలా సాధారణమని, కానీ యూకేలో వీటికి అపాయింట్‌మెంట్ తీసుకోవాలని లేదా మనమే వెళ్లి తెచ్చుకోవాలని ఆమె తెలిపారు. అలాగే, మధ్యతరగతి కుటుంబాలకు కూడా అందుబాటులో ఉండే పని మనుషులు, వంట మనుషులు, డ్రైవర్లు వంటి సౌకర్యాలు అక్కడ అత్యంత ఖరీదైన లగ్జరీ వ్యవహారమని పేర్కొన్నారు.

వీటితో పాటు, భారత్‌లో చిన్న చిన్న రిపేర్లను తక్కువ ధరకే, వెంటనే చేసే దుకాణాలు వీధికొకటి ఉంటాయని, కానీ విదేశాల్లో వస్తువు పాడైతే బాగు చేయించడం కంటే కొత్తది కొనడమే సులభమని ఆమె చెప్పారు. ఆకస్మిక ప్రయాణాలు, చివరి నిమిషంలో పనులు చక్కబెట్టుకోవడం, కస్టమర్ సర్వీస్‌లో ఉండే వెసులుబాటు, అర్ధరాత్రి కూడా అందుబాటులో ఉండే ఫుడ్ డెలివరీ, ప్లంబర్, ఎలక్ట్రీషియన్ వంటి వారు వెంటనే దొరకడం వంటివి భారత్‌లో ఉన్నంత సులభంగా విదేశాల్లో ఉండవని ఆమె తన అనుభవాలను పంచుకున్నారు. కొరియర్ డెలివరీ ఏజెంట్లు మనకోసం వేచి చూడటం, పలుమార్లు ఫోన్ చేయడం వంటివి కూడా భారత్‌కే ప్రత్యేకమని ఆమె అన్నారు.

ఈ వీడియో చూసిన ఎంతోమంది ఎన్నారైలు "మా మనసులోని మాట చెప్పావ్" అంటూ కామెంట్లు పెడుతున్నారు. "విదేశాలకు వెళ్ళిన తర్వాతే ఇండియాలో మనం పొందే సౌకర్యాల విలువ తెలుస్తుంది" అని ఒకరంటే, "భారత్ నిజంగా మనల్ని చాలా విషయాల్లో గారాబం చేస్తుంది" అని మరొకరు వ్యాఖ్యానించారు. 

అయితే, కొందరు మాత్రం ఈ సౌకర్యాల వెనుక ఉన్న కార్మికుల పరిస్థితులు, కొన్నిసార్లు నమ్మకం లేకపోవడం వంటి ప్రతికూల అంశాలను కూడా ప్రస్తావించారు. మొత్తం మీద ఈ వీడియో ఏ దేశం గొప్పది, ఏది తక్కువ అని చెప్పడం కంటే, భారతీయ పట్టణ జీవితంలో ఉన్న కొన్ని ప్రత్యేకమైన, కనిపించని సౌకర్యాల విలువను గుర్తు చేస్తోందని పలువురు అభిప్రాయపడుతున్నారు.