భారత్‌లో ఈ-బైక్‌ల జోరు.. రికార్డు స్థాయిలో 14 లక్షల రిజిస్ట్రేషన్లు

భారతదేశంలో ఎలక్ట్రిక్ వాహనాల విప్లవం వేగంగా విస్తరిస్తోంది. ముఖ్యంగా ఎలక్ట్రిక్ టూవీలర్ (ఈ-టూవీలర్) సెగ్మెంట్ కొత్త రికార్డులు సృష్టిస్తోంది. 2026 ఆర్థిక సంవత్సరంలో దేశవ్యాప్తంగా ఏకంగా 14 లక్షల ఎలక్ట్రిక్ ద్విచక్ర వాహనాలు రిజిస్టర్ అయ్యాయి. ఈ గణాంకాలను వాహన్ పోర్టల్ డేటా ఆధారంగా స్టాటిస్టా సంస్థ వెల్లడించింది.

గత ఆర్థిక సంవత్సరంలో నమోదైన 12 లక్షల యూనిట్లతో పోలిస్తే ఇది 22 శాతం అధికం. దేశంలో అమ్ముడవుతున్న మొత్తం ఎలక్ట్రిక్ వాహనాల్లో దాదాపు 10లో 6 వాహనాలు ఎలక్ట్రిక్ టూవీలర్లే కావడం గమనార్హం. 2025-26 ఆర్థిక సంవత్సరంలో మొత్తం వాహన రిజిస్ట్రేషన్లలో ఈ-టూవీలర్ల వాటా 6.5 శాతంగా నమోదైంది.

ఈ విభాగంలో టీవీఎస్ మోటార్ కంపెనీ 3,41,513 యూనిట్లతో అగ్రస్థానంలో నిలిచింది. ఆ తర్వాత బజాజ్ ఆటో (2,89,349 యూనిట్లు), ఏథర్ ఎనర్జీ (2,39,178 యూనిట్లు) ఉన్నాయి. 2026 మార్చిలో రిజిస్ట్రేషన్లు రికార్డు స్థాయికి చేరడం ఈ వృద్ధికి దోహదపడింది. పీఎం ఈ-డ్రైవ్ పథకం కింద సబ్సిడీలను 2026 జులై 31 వరకు పొడిగించడం, అధిక ఇంధన ధరలు అమ్మకాలు పెరగడానికి ప్రధాన కారణాలుగా నిలిచాయి.

కొత్త ఆర్థిక సంవత్సరంలో కూడా ఈ జోరు కొనసాగుతోంది. 2026 ఏప్రిల్ లో 1,48,740 ఈ-టూవీలర్లు రిజిస్టర్ కాగా, ఇది గతేడాదితో పోలిస్తే 61 శాతం పెరుగుదల. మే మధ్య నాటికి వెలువడిన ప్రాథమిక గణాంకాల ప్రకారం, మార్కెట్‌లో టీవీఎస్ 25 శాతం వాటాను కలిగి ఉండగా, బజాజ్ 23 శాతంతో గట్టి పోటీ ఇస్తోంది.

విశాలమైన పంపిణీ నెట్‌వర్క్‌లు ఉన్న ప్రముఖ తయారీదారులు ఈ పోటీలో మార్కెట్ వాటాను పెంచుకుంటున్నారని పరిశ్రమ విశ్లేషకులు చెబుతున్నారు. తక్కువ ఖర్చు, పర్యావరణ అనుకూల రవాణాకు వినియోగదారులు మొగ్గుచూపడం, ప్రభుత్వ విధానాలు కలిసి భారతదేశ ఎలక్ట్రిక్ మొబిలిటీ ప్రయాణంలో ఈ-స్కూటర్లు, మోటార్‌సైకిళ్లు కీలక పాత్ర పోషిస్తున్నాయని ఈ గణాంకాలు స్పష్టం చేస్తున్నాయి.