రాజస్థాన్ బౌలర్లను ఉతికారేసిన మార్ష్, ఇంగ్లిస్.. లక్నో భారీ స్కోరు

ఇండియన్ ప్రీమియర్ లీగ్ 2026లో భాగంగా రాజస్థాన్ రాయల్స్‌తో జరుగుతున్న మ్యాచ్‌లో లక్నో సూపర్ జెయింట్స్ బ్యాటర్లు పరుగుల సునామీ సృష్టించారు. జైపూర్‌లోని సవాయ్ మాన్‌సింగ్ స్టేడియంలో టాస్ ఓడి మొదట బ్యాటింగ్ చేసిన లక్నో, నిర్ణీత 20 ఓవర్లలో 5 వికెట్ల నష్టానికి 220 పరుగుల భారీ స్కోరు సాధించింది. ఓపెనర్లు మిచెల్ మార్ష్ (96), జోష్ ఇంగ్లిస్ (60) వీరవిహారం చేశారు.

ఇన్నింగ్స్ ఆరంభం నుంచే వీరిద్దరూ రాజస్థాన్ బౌలర్లపై ఎదురుదాడికి దిగారు. పవర్‌ప్లేలోనే 83 పరుగులు రాబట్టి తమ ఉద్దేశాన్ని స్పష్టం చేశారు. కేవలం 29 బంతుల్లో 7 ఫోర్లు, 3 సిక్సర్లతో 60 పరుగులు చేసిన ఇంగ్లిస్.. తొలి వికెట్‌కు 109 పరుగుల భాగస్వామ్యం అందించి ఔటయ్యాడు. మరోవైపు, అద్భుతంగా బ్యాటింగ్ చేసిన మిచెల్ మార్ష్‌ను దురదృష్టం వెంటాడింది. 57 బంతుల్లో 11 ఫోర్లు, 5 సిక్సర్లతో 96 పరుగులు చేసి, సెంచరీకి కేవలం నాలుగు పరుగుల దూరంలో రనౌట్‌గా వెనుదిరిగాడు.

చివర్లో కెప్టెన్ రిషభ్ పంత్ (23 బంతుల్లో 35) కూడా వేగంగా ఆడటంతో లక్నో భారీ స్కోరు సాధించింది. రాజస్థాన్ బౌలర్లలో యశ్ రాజ్ పంజా 35 పరుగులిచ్చి రెండు వికెట్లు తీయగా, జోఫ్రా ఆర్చర్ ఒక వికెట్ పడగొట్టాడు. మిగతా బౌలర్లు భారీగా పరుగులు సమర్పించుకున్నారు. ఈ మ్యాచ్‌లో గెలవాలంటే రాజస్థాన్ 221 పరుగుల కఠిన లక్ష్యాన్ని ఛేదించాల్సి ఉంది.