పాకిస్థాన్‌లో కృష్ణ నగర్, రామ్ గలీ... ఎక్కడో చూడండి!

పాకిస్థాన్‌లో ఓ అనూహ్య పరిణామం చోటుచేసుకుంటోంది. దేశ విభజన జరిగి దాదాపు 80 ఏళ్లు గడిచిన తర్వాత, లాహోర్ మహానగరం తన చారిత్రక గుర్తింపును తిరిగి పొందుతోంది. ఒకప్పుడు ఇస్లామీకరణలో భాగంగా మార్చిన వీధులు, ప్రాంతాల పేర్లను ప్రస్తుతం పాత హిందూ, సిక్కు, జైన్ మరియు వలసరాజ్యాల కాలంనాటి పేర్లతో పునరుద్ధరిస్తున్నారు. అధికారిక సైన్‌బోర్డులపై ఇస్లాంపురా ఇప్పుడు "కృష్ణ నగర్"గా, బబ్రీ మసీదు చౌక్ "జైన్ మందిర్ చౌక్"గా, రెహమాన్ గలి "రామ్ గలి"గా దర్శనమిస్తున్నాయి.

గత రెండు నెలల కాలంలోనే దాదాపు తొమ్మిది ప్రాంతాల పేర్లను మార్చారు. మౌలానా జఫర్ అలీ ఖాన్ చౌక్‌కు తిరిగి "లక్ష్మీ చౌక్" అని, హమీద్ నిజామీ రోడ్‌కు "టెంపుల్ స్ట్రీట్" అని, ఫాతిమా జిన్నా రోడ్‌కు "క్వీన్స్ రోడ్" అని పాత పేర్లను అధికారికంగా పునరుద్ధరించారు. మరిన్ని ప్రాంతాలు తమ పాత గౌరవాన్ని తిరిగి పొందడానికి సిద్ధమవుతున్నాయి. ఈ మార్పుల వెనుక మాజీ ప్రధాని నవాజ్ షరీఫ్ కలల ప్రాజెక్టు అయిన 'లాహోర్ హెరిటేజ్ ఏరియా రివైవల్' (ఎల్ హెచ్ఏఆర్) ఉంది. సుమారు 50 బిలియన్ పాకిస్థానీ రూపాయల విలువైన ఈ ప్రాజెక్టును నవాజ్ షరీఫ్, ఆయన కుమార్తె, ప్రస్తుత పంజాబ్ ముఖ్యమంత్రి మర్యమ్ నవాజ్ 2025లో ప్రారంభించారు. యూరప్ దేశాల తరహాలో చారిత్రక వారసత్వాన్ని కాపాడటం, హెరిటేజ్ టూరిజాన్ని ప్రోత్సహించి ఆదాయం పెంచుకోవడం దీని అధికారిక లక్ష్యం.

అయితే, ఈ చర్యల వెనుక కేవలం వారసత్వ పరిరక్షణే కాకుండా బలమైన దౌత్య, ఆర్థిక కారణాలు ఉన్నాయని విశ్లేషకులు భావిస్తున్నారు. టెర్రర్ ఫైనాన్సింగ్ ఆరోపణలు, ఎఫ్ఏటీఎఫ్ ఆంక్షలు, ఐఎంఎఫ్ బెయిలవుట్లపై ఆధారపడిన పాకిస్థాన్, తన "రాడికల్ ఇమేజ్"ను తొలగించుకోవాలని చూస్తోంది. తమది సహనశీల, బహుళ సాంస్కృతిక దేశమని పశ్చిమ దేశాలకు చాటి చెప్పడం ద్వారా దౌత్యపరమైన, ఆర్థిక సహాయం పొందాలనేది అసలు వ్యూహంగా కనిపిస్తోంది.

ఇదే సమయంలో, మింటో పార్క్‌లో క్రికెట్ మైదానాలను పునరుద్ధరించాలన్న నవాజ్ షరీఫ్ ప్రతిపాదన కూడా చర్చనీయాంశమైంది. 2015లో ఆయన సోదరుడు షెహబాజ్ షరీఫ్ కూల్చివేసిన ఈ మైదానాలను తిరిగి నిర్మించడం ద్వారా "డ్యామేజ్ కంట్రోల్" చేసుకుంటున్నారని భావిస్తున్నారు. పాకిస్థాన్‌లో మైనారిటీల పరిస్థితి క్లిష్టంగా ఉన్నప్పటికీ, ఈ పేర్ల మార్పుపై పెద్దగా వ్యతిరేకత రాకపోవడం గమనార్హం. ఇది ప్రభుత్వ అజెండాలో భాగంగానే ముందుకు సాగుతోందనడానికి నిదర్శనంగా నిలుస్తోంది.