ఇరాన్ వార్ ఎఫెక్ట్: అమెరికాలో మండిపోతున్న ధరలు, ట్రంప్‌కు చిక్కులు

ఇరాన్‌తో కొనసాగుతున్న సైనిక సంక్షోభం అమెరికాలో రాజకీయంగా ప్రకంపనలు సృష్టిస్తోంది. ఈ యుద్ధం కారణంగా ఇంధన ధరలు విపరీతంగా పెరగడంతో, అది అధ్యక్షుడు డొనాల్డ్ ట్రంప్, రిపబ్లికన్ పార్టీకి మధ్యంతర ఎన్నికల ముందు పెద్ద తలనొప్పిగా మారింది. పెరిగిన ధరల వల్ల ప్రజలు పడుతున్న ఇబ్బందులపై డెమొక్రాట్లు విమర్శలు గుప్పిస్తుండగా, ట్రంప్ సర్కార్ మాత్రం దేశ భద్రతే తమకు ముఖ్యమని వాదిస్తోంది.

అంతర్జాతీయ మీడియా కథనాల ప్రకారం, అమెరికాలో గ్యాస్ ధర గ్యాలన్‌కు సగటున 4.51 డాలర్లకు చేరింది. ఇరాన్ సంక్షోభం మొదలైనప్పటి నుంచి అమెరికన్లు ఇంధనంపై అదనంగా 45 బిలియన్ డాలర్లు ఖర్చు చేశారని అంచనా. ఈ విషయంపై డెమొక్రాట్లు తీవ్రంగా స్పందిస్తున్నారు. ట్రంప్ ప్రభుత్వ చర్యల వల్లే డీజిల్, ఎరువులు, గృహ రుణాల వరకు ప్రతీదీ భారంగా మారిందని మాజీ రవాణా మంత్రి పీట్ బట్టిగీగ్ ఆరోపించారు.

అయితే, ఈ విమర్శలను ట్రంప్ సర్కార్ తిప్పికొడుతోంది. "ప్రజల ఆర్థిక పరిస్థితి గురించి నేను ఆలోచించడం లేదు. ఇరాన్‌ను అణ్వాయుధం సొంతం చేసుకోనివ్వకూడదన్నదే నా లక్ష్యం" అని ట్రంప్ చేసిన వ్యాఖ్యలు రాజకీయ దుమారం రేపాయి. ట్రంప్ దేశాన్ని అనవసరమైన యుద్ధంలోకి లాగారని డెమొక్రాటిక్ ప్రతినిధి హకీమ్ జెఫ్రీస్ విమర్శించారు. మరోవైపు, దేశ భద్రత ముందు ఈ ఆర్థిక ఇబ్బందులు తాత్కాలికమేనని రిపబ్లికన్లు వాదిస్తున్నారు. ఇరాన్ నుంచి ఎదురయ్యే ముప్పు పెద్దదని, యుద్ధం ముగిసిన వెంటనే ధరలు తగ్గుతాయని వారు ధీమా వ్యక్తం చేస్తున్నారు.