ఆర్థికంగా రాక్ సాలిడ్ గా ఉండే దేశాలు ఇవే... టాప్ లో యూఏఈ... భారత్ ర్యాంకు ఎంత?

ప్రపంచంలో ఆర్థికంగా అత్యంత పటిష్ఠంగా, స్థిరంగా ఉన్న దేశాల జాబితా విడుదలైంది. యూఎస్ న్యూస్ అండ్ వరల్డ్ రిపోర్ట్ విడుదల చేసిన 2026 సంవత్సరానికి గాను ఈ ర్యాంకింగ్స్‌లో యునైటెడ్ అరబ్ ఎమిరేట్స్ (యూఏఈ) అగ్రస్థానంలో నిలిచి అందరినీ ఆశ్చర్యపరిచింది. మరోవైపు, ప్రపంచంలోనే అతిపెద్ద ఆర్థిక వ్యవస్థ అయిన అమెరికా టాప్-10లో కూడా చోటు దక్కించుకోలేకపోయింది. 147 కోట్ల జనాభా కలిగిన భారత్ ఈ జాబితాలో 47వ స్థానంలో నిలిచింది.

అసలు ఆర్థిక స్థిరత్వం అంటే ఏమిటి? తక్కువ రుణాలు, బలమైన ఆర్థిక వ్యవస్థ, యుద్ధాలు, మహమ్మారులు, ఆర్థిక సంక్షోభాల వంటి ఎలాంటి సవాళ్లనైనా తట్టుకుని నిలబడే సత్తా ఉన్న దేశాలను ఆర్థికంగా స్థిరమైనవిగా పరిగణిస్తారు. ఇలాంటి దేశాల్లో మెరుగైన ప్రజా రవాణా, ఆధునిక మౌలిక సదుపాయాలు, నమ్మకమైన డిజిటల్ చెల్లింపుల వ్యవస్థలు ఉంటాయి. ఇది అక్కడి ప్రజల జీవన ప్రమాణాలనే కాకుండా, పర్యాటకుల అనుభవాన్ని కూడా మెరుగుపరుస్తుంది.

ఈ తాజా జాబితాలో యూఏఈ (504 బిలియన్ డాలర్ల జీడీపీ) తర్వాత స్విట్జర్లాండ్, జర్మనీ, కెనడా, జపాన్ దేశాలు టాప్-5లో ఉన్నాయి. ఆస్ట్రేలియా, స్వీడన్, డెన్మార్క్, నెదర్లాండ్స్, సౌదీ అరేబియా వంటి దేశాలు టాప్-10లో చోటు దక్కించుకున్నాయి. ఆశ్చర్యకరంగా, అగ్రరాజ్యం అమెరికా ఈ జాబితాలో 13వ స్థానంతో సరిపెట్టుకుంది. 

ఇక మన పొరుగు దేశమైన పాకిస్థాన్ కనీసం ఈ జాబితాలో స్థానం కూడా సంపాదించుకోలేకపోయింది. ఇక భారతదేశం విషయానికొస్తే, 4.15 ట్రిలియన్ డాలర్ల జీడీపీతో వేగంగా అభివృద్ధి చెందుతున్న ఆర్థిక వ్యవస్థగా పేరున్నప్పటికీ, ఆర్థిక స్థిరత్వం విషయంలో మాత్రం 47వ స్థానంలో నిలవడం గమనార్హం. ఈ ర్యాంకింగ్స్ ఆర్థిక విశ్లేషకులకు, వివిధ దేశాల్లో పెట్టుబడులు పెట్టాలనుకునేవారికి, పర్యాటకులకు ఒక ముఖ్యమైన సూచికగా ఉపయోగపడతాయి.