భారతీయులు ఒక ఏడాది పాటు బంగారం కొనకపోతే ఏం జరుగుతుంది?

అంతర్జాతీయంగా నెలకొన్న అనిశ్చితి, పెరుగుతున్న చమురు ధరల నేపథ్యంలో దేశ ఆర్థిక వ్యవస్థను పరిరక్షించేందుకు ప్రజలు ఒక కీలక త్యాగానికి సిద్ధం కావాలని ప్రధాని నరేంద్ర మోదీ విజ్ఞప్తి చేశారు. రాబోయే ఏడాది పాటు బంగారం కొనుగోళ్లను పూర్తిగా నిలిపివేయాలని ఈ నెల‌ 11న ఆయన దేశ ప్రజలకు పిలుపునిచ్చారు. ప్రపంచంలోనే అతిపెద్ద బంగారం వినియోగదారుల్లో ఒకటైన భారత్ ఒక ఏడాది పాటు బంగారం కొనకపోతే, ప్రపంచ పసిడి మార్కెట్‌పై తీవ్ర ప్రభావాన్ని చూపుతుందని నిపుణులు విశ్లేషిస్తున్నారు.

ప్రపంచ మార్కెట్‌కు భారీ షాక్
ప్రపంచ బంగారం డిమాండ్‌లో భారత్ వాటా సుమారు 20 శాతం నుంచి 25 శాతం వరకు ఉంటుంది. ఏటా సగటున 800 టన్నుల బంగారాన్ని భారతీయులు కొనుగోలు చేస్తుంటారు. ఇప్పుడు ఈ డిమాండ్ ఒక్కసారిగా ఆగిపోతే, అంతర్జాతీయ మార్కెట్‌లో బంగారం మిగులు భారీగా పెరిగిపోతుంది. ఇది స్పాట్ ధరలు గణనీయంగా పడిపోవడానికి దారితీయవచ్చని నిపుణులు అంచనా వేస్తున్నారు. 

భారత కొనుగోలుదారులు లేని ప్రపంచ మార్కెట్ తీవ్రమైన ఒత్తిడికి గురవుతుందని, ఇదొక "భూకంపం" లాంటి పరిణామమని వారు అభిప్రాయపడుతున్నారు. అయితే, ఆసక్తికరంగా ప్రపంచ మార్కెట్‌లో ధరలు తగ్గినా, దేశీయంగా మాత్రం కృత్రిమ కొరత, అధిక ప్రీమియంల కారణంగా బంగారం ధరలు పెరిగే ప్రమాదం ఉందని హెచ్చరిస్తున్నారు. ఇప్పటికే ఔన్సుపై ప్రీమియం 20 డాలర్లను దాటడం గమనార్హం.

ఆర్థిక వ్యవస్థకు రక్షణ కవచం
ప్రస్తుత ఖాతా లోటు (సీఏడీ)ను అదుపులో ఉంచి, రూపాయి విలువ పతనం కాకుండా కాపాడే వ్యూహంలో భాగంగానే ప్రభుత్వం ఈ అసాధారణ నిర్ణయం తీసుకుంది. భారత్ దిగుమతుల్లో ముడి చమురు తర్వాత బంగారం రెండో స్థానంలో ఉంది. ఏడాది పాటు పసిడి కొనుగోళ్లు ఆపితే, దేశానికి సుమారు 60 నుంచి 70 బిలియన్ డాలర్ల విలువైన విదేశీ మారకద్రవ్యం ఆదా అవుతుంది. పశ్చిమాసియా సంక్షోభంతో ప్రియంగా మారిన ఇంధన దిగుమతుల చెల్లింపుల కోసం ఈ ఆదా చేసిన డాలర్లను ఉపయోగించుకోవచ్చని ఆర్థిక నిపుణులు వివరిస్తున్నారు.

ఉపాధిపై తీవ్ర ప్రభావం.. స్మగ్లింగ్ భయాలు
ప్రభుత్వ విజ్ఞప్తికి ఆర్థికంగా సానుకూల అంశాలు ఉన్నప్పటికీ, ఇది దేశంలోని అతిపెద్ద ఉపాధి రంగాలలో ఒకటైన స్వర్ణకార పరిశ్రమను తీవ్రంగా దెబ్బతీయనుంది. దేశవ్యాప్తంగా రత్నాలు, ఆభరణాల రంగంపై కోటి మందికి పైగా కార్మికులు, నిపుణులు ఆధారపడి జీవిస్తున్నారు. కొనుగోళ్లు పూర్తిగా నిలిచిపోతే, లక్షలాది మంది ఉపాధి కోల్పోయే ప్రమాదం ఉంది. ఇప్పటికే ఈ ప్రకటనతో జ్యువెలరీ కంపెనీల షేర్లు అమ్మకాల ఒత్తిడిని ఎదుర్కొంటున్నాయి. మరోవైపు వివాహాలు, సాంప్రదాయ అవసరాల దృష్ట్యా బంగారానికి ఉన్న బలమైన సాంస్కృతిక బంధం కారణంగా డిమాండ్ పూర్తిగా ఆగిపోదని, చట్టపరమైన ఆంక్షలు స్మగ్లింగ్‌ను పెంచుతాయని నిపుణులు హెచ్చరిస్తున్నారు.

దీనికి ప్రత్యామ్నాయంగా భౌతిక బంగారం దిగుమతుల అవసరం లేని గోల్డ్ ఈటీఎఫ్‌లు, సావరిన్ గోల్డ్ బాండ్ల వైపు ప్రజలను ప్రభుత్వం ప్రోత్సహిస్తోంది. కాగా, ఒకవైపు ప్రజలను బంగారం కొనవద్దని కోరుతూనే, మరోవైపు దేశ ఆర్థిక స్థిరత్వం కోసం రిజర్వ్ బ్యాంక్ ఆఫ్ ఇండియా (ఆర్‌బీఐ) రికార్డు స్థాయిలో 880 టన్నుల బంగారాన్ని తన నిల్వల్లో ఉంచుకోవడం గమనార్హం.