పిజ్జా పిండి కలుపుతూ అందులో ఉమ్మేశాడు... ఓనర్ అరెస్ట్

ఢిల్లీకి సమీపంలోని నోయిడాలో దారుణ ఘటన వెలుగుచూసింది. పిజ్జా పిండిపై ఉమ్మివేస్తున్నట్లుగా ఉన్న వీడియో వైరల్ కావడంతో, ఓ ఫుడ్ అవుట్‌లెట్ యజమానిని పోలీసులు అరెస్టు చేశారు. ఈ ఘటన ఆహార పరిశుభ్రతపై తీవ్ర ఆందోళనలకు దారితీసింది.

వివరాల్లోకి వెళితే, నోయిడా సెక్టార్-22లోని చౌరా గ్రామంలో ముజమ్మిల్ అనే వ్యక్తి 'పిజ్జా హంట్' పేరుతో ఫుడ్ అవుట్‌లెట్ నడుపుతున్నాడు. షాపులోని సీసీటీవీ ఫుటేజీలో అతడు పిజ్జా పిండిని తయారుచేస్తూ దానిపై ఉమ్మివేస్తున్నట్లు రికార్డయింది. ఈ వీడియోను గమనించిన హిందూ రక్షా దళ్ సభ్యులు పోలీసులకు ఫిర్యాదు చేశారు. వారు ముజమ్మిల్‌ను పట్టుకుని పోలీసులకు అప్పగించగా, పోలీసులు అతడిని అరెస్టు చేశారు.

అయితే, పోలీసుల విచారణలో నిందితుడు ముజమ్మిల్ తనపై వచ్చిన ఆరోపణలను ఖండించాడు. తాను పిండిపై ఉమ్మలేదని, దానిపై ఉన్న అదనపు పొడి పిండిని తొలగించడానికి గాలి ఊదినట్లు చెప్పాడు. ఈ వీడియోపై మరింత స్పష్టత కోసం ఫోరెన్సిక్ విశ్లేషణ చేసే అవకాశం ఉందని పోలీసులు తెలిపారు. షాపులోని ఇతర సిబ్బందిని కూడా పోలీసులు విచారిస్తున్నారు.

ఈ ఘటనకు సంబంధించిన వీడియో సోషల్ మీడియాలో వైరల్ కావడంతో నెటిజన్ల నుంచి తీవ్ర ఆగ్రహం వ్యక్తమవుతోంది. ఫుడ్ అవుట్‌లెట్లలో పరిశుభ్రతా ప్రమాణాలపై కఠిన చర్యలు తీసుకోవాలని పలువురు డిమాండ్ చేస్తున్నారు. ఈ ఘటనతో ఆహార భద్రతపై మరోసారి ఆందోళనలు మొదలయ్యాయి.