దేశం కోసం ఇంధనం పొదుపు చేయండి... ప్రధాని మోదీ ఈ పిలుపు ఎందుకు ఇచ్చారంటే..!

ప్రధాని నరేంద్ర మోదీ దేశ ప్రజలకు ఓ అసాధారణమైన, ప్రత్యక్ష పిలుపునిచ్చారు. ఇది ఓట్ల కోసమో, ప్రభుత్వ పథకం కోసమో కాదు. దేశ భవిష్యత్తు కోసం ప్రతి ఒక్కరి దైనందిన అలవాట్లను మార్చుకోవాలని ఆయన కోరారు. గుజరాత్‌లోని వడోదరలో జరిగిన ఓ బహిరంగ సభలో మాట్లాడిన ప్రధాని, 20 గంటల వ్యవధిలో రెండోసారి ఇంధన పొదుపు ఆవశ్యకతను నొక్కిచెప్పారు. పశ్చిమాసియాలో కొనసాగుతున్న ఉద్రిక్తతలు, అంతర్జాతీయంగా పెరుగుతున్న ఇంధన ధరలు, సరఫరా గొలుసులో అంతరాయాల వల్ల దేశ ఆర్థిక వ్యవస్థ ఎదుర్కొంటున్న సవాళ్లను అధిగమించేందుకు 140 కోట్ల మంది భారతీయులు కలిసి రావాలని ఆయన విజ్ఞప్తి చేశారు.

ఈసారి ప్రధాని మోదీ చేసిన విజ్ఞప్తి ఓ బడ్జెట్ ప్రకటనలాగానో, కొత్త పాలసీలాగానో లేదు. దేశం ప్రస్తుతం ఓ యుద్ధం చేయకపోయినా.. దాని పర్యవసానాలకు మూల్యం చెల్లిస్తోందని, ఈ పరిస్థితుల్లో ప్రతి పౌరుడూ ఒక ‘ఆర్థిక సైనికుడి’లా వ్యవహరించాలని ఆయన కోరారు. "140 కోట్ల మంది ప్రజలు ఒక్క అడుగు ముందుకు వేస్తే, దేశం 140 కోట్ల అడుగులు ముందుకు వేస్తుంది. అందుకే, ఈ ప్రపంచ సంక్షోభ సమయంలో నా దేశ ప్రజలకు కొన్ని ప్రత్యేక అభ్యర్థనలు చేస్తున్నాను" అని మోదీ అన్నారు.

ప్రధాని ఈ పిలుపు ఎందుకు ఇచ్చారంటే..!
ప్రధాని మోదీ ఈ విజ్ఞప్తి చేయడానికి బలమైన ఆర్థిక కారణాలున్నాయి. ముడి చమురు వినియోగంలో, దిగుమతిలో భారత్ ప్రపంచంలోనే మూడో అతిపెద్ద దేశం. పెట్రోలియం ప్లానింగ్ అండ్ అనాలిసిస్ సెల్ (PPAC) గణాంకాల ప్రకారం 2025 ఆర్థిక సంవత్సరం ప్రథమార్ధంలో భారత్ ముడి చమురు దిగుమతులపై ఆధారపడటం 88 శాతానికి చేరింది. గతేడాది ఇదే సమయానికి ఇది 87.6 శాతంగా ఉండేది. దేశీయంగా ఉత్పత్తి నిలకడగా ఉండగా, డిమాండ్ మాత్రం భారీగా పెరుగుతుండటమే ఇందుకు కారణం.

దిగుమతుల కోసం వెచ్చిస్తున్న విదేశీ మారక ద్రవ్యం కూడా ఆందోళనకరంగా మారింది. 2025 ఆర్థిక సంవత్సరం మొదటి ఆరు నెలల్లోనే భారత్ ముడి చమురు దిగుమతులకైన ఖర్చు 71.3 బిలియన్ డాలర్లకు (సుమారు రూ. 5.95 లక్షల కోట్లు) చేరింది. ఇది గత ఏడాదితో పోలిస్తే 12 శాతం అధికం. ఈ నేపథ్యంలోనే ప్రధాని మోదీ ఇంధన పొదుపును ఒక జాతీయ బాధ్యతగా అభివర్ణించారు. "మనకు పెద్ద చమురు బావులు లేవు. పెట్రోల్, డీజిల్, గ్యాస్‌ను దిగుమతి చేసుకోవాల్సిందే. ప్రపంచవ్యాప్తంగా వీటి ధరలు విపరీతంగా పెరిగినందున, ఇంధనాన్ని పొదుపు చేసి, దానికోసం వెచ్చిస్తున్న విదేశీ మారక ద్రవ్యాన్ని కాపాడుకోవడం మనందరి బాధ్యత" అని ఆయన స్పష్టం చేశారు.

ప్రధాని సూచించిన మార్గాలు
ఇంధనాన్ని ఆదా చేసేందుకు ప్రధాని కొన్ని స్పష్టమైన సూచనలు చేశారు. వీలైనంత వరకు పెట్రోల్, డీజిల్ వాడకాన్ని తగ్గించాలని కోరారు. అందుబాటులో ఉన్న చోట్ల మెట్రో రైళ్లు, ఎలక్ట్రిక్ బస్సులు, ఇతర ప్రజా రవాణా వ్యవస్థలను ఎక్కువగా ఉపయోగించుకోవాలని సూచించారు. సొంత కార్లు ఉన్నవారు కార్‌పూలింగ్ పద్ధతిని ప్రోత్సహించాలని, ఒకే వాహనంలో ఎక్కువ మంది ప్రయాణించాలని అన్నారు. ఎలక్ట్రిక్ వాహనాల వాడకాన్ని పెంచడంతో పాటు సరుకు రవాణాకు రోడ్డు మార్గాల కన్నా రైలు మార్గాన్ని ఎంచుకోవడం మంచిదని తెలిపారు. ఈ చిన్న చిన్న మార్పుల ద్వారా ప్రతి ఒక్కరూ దేశ ఆర్థిక వ్యవస్థను బలోపేతం చేయడంలో భాగస్వాములు కావచ్చని ప్రధాని మోదీ పిలుపునిచ్చారు.