ఏపీలో టీడీపీ కోసం పనిచేసి... ఇప్పుడు విజయ్ క్యాబినెట్ లో మంత్రి అయింది.. ఎవరీ కీర్తన?

తమిళనాడు రాజకీయాల్లో ఒక ఆసక్తికరమైన అధ్యాయం మొదలైంది. నిన్నమొన్నటి వరకు ఆంధ్రప్రదేశ్‌లో తెలుగుదేశం పార్టీ విజయానికి తెరవెనుక వ్యూహాలు రచించిన ఓ యువతి, ఇప్పుడు ఏకంగా తమిళనాడు మంత్రివర్గంలో చోటు దక్కించుకున్నారు. రాజకీయ వ్యూహకర్త స్థాయి నుంచి మంత్రిగా ఆమె ఎదిగిన తీరు అందరి దృష్టినీ ఆకర్షిస్తోంది. ఆమే ఎస్. కీర్తన (29).

దళపతి విజయ్ నేతృత్వంలోని 'తమిళగ వెట్రి కళగం' (టీవీకే) ప్రభుత్వం కొలువుదీరిన వేళ, ఆయన కేబినెట్‌లో చోటు దక్కించుకున్న అతి పిన్న వయస్కురాలిగా, ఏకైక మహిళగా కీర్తన చరిత్ర సృష్టించారు. విరుదునగర్ జిల్లాలోని 'భారత బాణసంచా రాజధాని'గా పేరుగాంచిన శివకాశీ నియోజకవర్గం నుంచి ఎమ్మెల్యేగా గెలిచి, ఆరు దశాబ్దాల చరిత్రలో ఆ స్థానం నుంచి ఎన్నికైన తొలి మహిళగా నిలిచారు.

విరుదునగర్ జిల్లాలో 1996లో పుట్టిన కీర్తన, తన ప్రాథమిక విద్యాభ్యాసాన్ని ప్రభుత్వ తమిళ మీడియం పాఠశాలలో పూర్తి చేశారు. ఆ తర్వాత మదురై కామరాజ్ యూనివర్సిటీ అనుబంధ కళాశాల నుంచి బీఎస్సీ మ్యాథమెటిక్స్‌లో పట్టా పొందారు. ఉన్నత చదువులపై ఆసక్తితో పుదుచ్చేరి యూనివర్సిటీలో చేరి 2019లో ఎంఎస్సీ స్టాటిస్టిక్స్‌లో మాస్టర్స్ డిగ్రీ పూర్తి చేశారు. చదువులో చురుగ్గా ఉండే ఆమె, ప్రజా జీవితంపై ఆసక్తితో రాజకీయ వ్యూహరచన రంగంలోకి అడుగుపెట్టారు.

రాజకీయాల్లోకి రాకముందు కీర్తన, ఐప్యాక్ (IPAC) మరియు షోటైమ్ కన్సల్టింగ్ వంటి ప్రఖ్యాత పొలిటికల్ కన్సల్టెన్సీ సంస్థల్లో డిజిటల్ క్యాంపెయిన్ స్ట్రాటజిస్ట్‌గా పనిచేశారు. ఈ క్రమంలో ఆమె దేశంలోని పలువురు అగ్రశ్రేణి నాయకులతో కలిసి పనిచేసే అవకాశం దక్కించుకున్నారు. ఆంధ్రప్రదేశ్‌లో తెలుగు దేశం పార్టీ (TDP), పశ్చిమ బెంగాల్‌లో తృణమూల్ కాంగ్రెస్ (TMC), తమిళనాట ద్రవిడ మున్నేత్ర కజగం (DMK) వంటి బలమైన పార్టీల ఎన్నికల వ్యూహరచనలో పాలుపంచుకున్నారు. ఈ అనుభవంతో ముఖ్యమంత్రులు స్టాలిన్, మమతా బెనర్జీ, చంద్రబాబు నాయుడు వంటి నేతల పనితీరును దగ్గర నుంచి గమనించారు. ఈ అనుభవమే పాలన, అధికార యంత్రాంగం, బ్యూరోక్రసీ పనితీరుపై తనకు లోతైన అవగాహన కల్పించిందని ఆమె ఒక సందర్భంలో తెలిపారు.

కీర్తన బహుభాషా కోవిదురాలు. తమిళం, ఇంగ్లీషు, హిందీ, తెలుగుతో పాటు మరో భాషలో అనర్గళంగా మాట్లాడగలరు. బహుళ భాషలు నేర్చుకోవడం వల్ల వివిధ రాష్ట్రాల్లో పనిచేయడానికి, ప్రజలతో నేరుగా మమేకమవడానికి ఎంతో సహాయపడిందని ఆమె అన్నారు. ముఖ్యంగా, విజయ్ సందేశాన్ని దేశవ్యాప్తంగా ఎక్కువ మందికి చేరవేయాలనే ఉద్దేశంతోనే హిందీ మాట్లాడాలని నిర్ణయించుకున్నట్లు ఆమె వివరించారు. 

2026 అసెంబ్లీ ఎన్నికల్లో శివకాశి నియోజకవర్గం నుంచి బరిలోకి దిగిన కీర్తన, 68,709 ఓట్లు సాధించి సంచలన విజయం నమోదు చేశారు. తన సమీప కాంగ్రెస్ అభ్యర్థి అశోకన్‌పై 11,670 ఓట్ల మెజారిటీతో గెలుపొందారు. ఈ విజయంతో ఆమె 70 ఏళ్ల శివకాశి చరిత్రలో గెలిచిన మొట్టమొదటి మహిళా ఎమ్మెల్యేగా నిలిచారు. శివకాశిలో ప్రచారం సందర్భంగా ఆమె తెలుగులోనూ ప్రసంగించడం విశేషం.

తన రాజకీయ ప్రవేశంపై కీర్తన మాట్లాడుతూ, "టీవీకే పార్టీ అందరికీ అందుబాటులో ఉండే ఒక వేదిక. నాకు రాజకీయ నేపథ్యం గానీ, డబ్బు నేపథ్యం గానీ లేదు. అయినా ఈ రోజు నేను ఇక్కడ ఉన్నానంటే కారణం ప్రజాసేవ చేయాలనే సంకల్పమే. ఆ ఉద్దేశం ఉన్న ఎవరికైనా ఇక్కడ స్వాగతం ఉంటుంది" అని వ్యాఖ్యానించారు. యువతకు, మహిళలకు స్ఫూర్తిగా నిలుస్తున్న కీర్తన ప్రస్థానం, తమిళనాడు రాజకీయాల్లో నూతన మార్పులకు సంకేతంగా నిలుస్తోంది.