అంతర్జాతీయ వివాదంలో అనంత్ అంబానీ 'వంతారా' జూ... బ్రెజిల్ పోలీసుల దర్యాప్తు

రిలయన్స్ అధినేత ముఖేష్ అంబానీ కుమారుడు అనంత్ అంబానీకి చెందిన గుజరాత్‌లోని ప్రతిష్ఠాత్మక 'వంతారా' జూ అంతర్జాతీయ వివాదంలో చిక్కుకుంది. అంతరించిపోతున్న వన్యప్రాణుల అక్రమ రవాణాకు సంబంధించిన ఒక కేసులో వంతారా జూ పేరు వెలుగులోకి వచ్చింది. ఈ కేసులో సంబంధాలున్నాయన్న అనుమానంతో ప్రముఖ అమెరికన్ పక్షి నిపుణుడు టోనీ సిల్వాను బ్రెజిల్ ఫెడరల్ పోలీసులు విచారిస్తున్నారు.

మే 1న సావో పాలోలోని గువారుల్హోస్ అంతర్జాతీయ విమానాశ్రయంలో టోనీ సిల్వా నుంచి మూడు సెల్‌ఫోన్లు, ఒక కంప్యూటర్‌ను పోలీసులు స్వాధీనం చేసుకున్నారు. అంతరించిపోతున్న గోల్డెన్ లయన్ టామరిన్స్ (ప్రత్యేకమైన కోతులు), లియర్స్ మకావ్ (పక్షులు) వంటి బ్రెజిలియన్ జాతులను వంతారా జూ కోసం అక్రమంగా కొనుగోలు చేయడానికి సిల్వా సమన్వయం చేశారని పోలీసులు అనుమానిస్తున్నారు.

కాగా, ఈ ఆరోపణలను వంతారా యాజమాన్యం తీవ్రంగా ఖండించింది. టోనీ సిల్వా తమ ఉద్యోగి కాదని, ఒక స్వతంత్ర కాంట్రాక్టర్ ద్వారా జంతువుల పోషణ, ఎన్‌క్లోజర్ డిజైన్ వంటి పరిమిత కన్సల్టెన్సీ సేవలు మాత్రమే అందించారని స్పష్టం చేసింది. అతని వ్యక్తిగత ప్రయాణాలతో తమకు ఎలాంటి సంబంధం లేదని, బ్రెజిల్ పర్యటన గురించి తమకు తెలియదని ఒక ప్రకటనలో పేర్కొంది.

టోనీ సిల్వాకు వన్యప్రాణుల అక్రమ రవాణాలో నేర చరిత్ర ఉంది. 1996లో అరుదైన పక్షులను అక్రమంగా తరలించిన కేసులో అతనికి ఏడేళ్ల జైలు శిక్ష పడింది. ప్రస్తుతం స్వాధీనం చేసుకున్న ఎలక్ట్రానిక్ పరికరాలను ఫోరెన్సిక్ విశ్లేషణకు పంపిన పోలీసులు, ఈ కేసులో అంతర్జాతీయ ముఠాల ప్రమేయంపై దర్యాప్తు చేస్తున్నారు. ఈ ఆరోపణలపై టోనీ సిల్వా ఇంకా స్పందించలేదు.