మనం విజయానికి చాలా దగ్గర్లోనే ఉన్నాం.. 12వ తరగతి విద్యార్థులకు విజయ్ సందేశం

తమిళగ వెట్రి కళగం (టీవీకే) అధినేత, ప్రముఖ నటుడు విజయ్ 12వ తరగతి పబ్లిక్ పరీక్షల ఫలితాలపై స్పందించారు. ఈ సందర్భంగా ఉత్తీర్ణులైన విద్యార్థులకు శుభాకాంక్షలు తెలుపుతూ, ఫెయిలైన వారికి ధైర్యం చెబుతూ ఒక ప్రకటన విడుదల చేశారు.

పట్టుదలతో శ్రమించి విజయాన్ని అందుకున్న తన ప్రియమైన తమ్ముళ్లు, చెల్లెళ్లకు హృదయపూర్వక అభినందనలు అని విజయ్ పేర్కొన్నారు. "ఈ విజయం మీ కఠోర శ్రమకు దక్కిన గుర్తింపు. ఉన్నత విద్య అనే తదుపరి దశలోకి పూర్తి నమ్మకంతో అడుగు పెట్టండి" అని ఆయన విద్యార్థులను ప్రోత్సహించారు.

అదే సమయంలో, పరీక్షల్లో ఉత్తీర్ణత సాధించలేకపోయిన వారు నిరాశ చెందవద్దని ఆయన సూచించారు. "విజయం సాధించలేకపోయిన వారు కుంగిపోవద్దు. మళ్లీ ప్రయత్నించండి. మనం విజయానికి చాలా దగ్గరలోనే ఉన్నామని గుర్తుంచుకోండి" అంటూ వారికి భరోసా ఇచ్చారు.

విద్యార్థులందరి భవిష్యత్తు ఉజ్వలంగా ప్రకాశించాలని విజయ్ ఆకాంక్షించారు. "మంచి జరుగుతుంది! విజయం తథ్యం!" అంటూ తనదైన శైలిలో వారికి స్ఫూర్తినిచ్చారు.