దేశంలో కాంగ్రెస్ జీరో.. కర్ణాటకలోనూ అదే గతి: ప్రహ్లాద్ జోషి

కేరళ మినహా దేశంలో కాంగ్రెస్ పార్టీకి ఉనికి లేకుండా పోయిందని, రాబోయే ఎన్నికల్లో కర్ణాటకలోనూ ఆ పార్టీకి ఓటమి తప్పదని కేంద్ర మంత్రి ప్రహ్లాద్ జోషి అన్నారు. ఐదు రాష్ట్రాల అసెంబ్లీ ఎన్నికల ఫలితాలపై సోమవారం ఢిల్లీలో ఏర్పాటు చేసిన విలేకరుల సమావేశంలో ఆయన మాట్లాడారు.

ఈ ఎన్నికల ఫలితాలు దుష్పరిపాలన, అవినీతి, మితిమీరిన బుజ్జగింపు రాజకీయాలకు వ్యతిరేకంగా ప్రజలు ఇచ్చిన స్పష్టమైన తీర్పు అని జోషి అభివర్ణించారు. ప్రధానమంత్రి నరేంద్ర మోదీ నాయకత్వంలోని ఎన్డీయే ప్రభుత్వానికి ఇది బలమైన మద్దతు అని తెలిపారు. అసోం, పశ్చిమ బెంగాల్, పుదుచ్చేరిలలో ఎన్డీయే అపూర్వ విజయాలు సాధించిందని, గత 12 ఏళ్ల మోదీ సమర్థ పాలనకు ఇదే నిదర్శనమని పేర్కొన్నారు.  

జాతీయ పార్టీ అయిన కాంగ్రెస్ దేశవ్యాప్తంగా ‘జీరో’ అయిపోయిందని, పశ్చిమ బెంగాల్, తమిళనాడులో ఆ పార్టీ ప్రదర్శన దారుణంగా ఉందని విమర్శించారు. కాంగ్రెస్ అవలంబిస్తున్న బుజ్జగింపు, అవినీతి, ఓటు బ్యాంకు రాజకీయాలను ప్రజలు తిరస్కరించారని అన్నారు. ప్రధాని నరేంద్ర మోదీపై కాంగ్రెస్ నేతలు నిరంతరం చేస్తున్న వ్యక్తిగత విమర్శలు, అనుచిత భాష తిప్పికొట్టాయని, ప్రజలు తమ ఓటుతో తగిన సమాధానం ఇచ్చారని తెలిపారు.

కర్ణాటకలోని కాంగ్రెస్ ప్రభుత్వం కూడా దుష్పరిపాలన, అవినీతితో నడుస్తోందని ఆరోపించిన జోషి వచ్చే ఎన్నికల్లో ప్రజలు ఆ పార్టీని ఇంటికి పంపిస్తారని జోస్యం చెప్పారు. శృంగేరి ఉప ఎన్నికల ఫలితాల్లో తమ అభ్యర్థి డీఎన్ జీవరాజ్ న్యాయపోరాటంతో గెలిచారని, ఇది న్యాయానికి దక్కిన విజయమని పేర్కొన్నారు. ఓట్ల లెక్కింపులో లోపాలపై డిప్యూటీ సీఎం డీకే శివకుమార్ బాధ్యతారాహిత్యంగా మాట్లాడుతున్నారని విమర్శించారు.