ఎన్నికల ఫలితాల ట్రెండ్స్.. భారీ లాభాల్లో స్టాక్ మార్కెట్లు

దేశీయ స్టాక్ మార్కెట్లు సోమవారం ట్రేడింగ్‌ను భారీ లాభాలతో ప్రారంభించాయి. పశ్చిమాసియాలో ఉద్రిక్తతలు తగ్గుముఖం పడతాయన్న ఆశలు, దేశీయంగా అసెంబ్లీ ఎన్నికల ఫలితాల సరళి సానుకూలంగా ఉండటంతో సూచీలు ఉత్సాహంగా కదులుతున్నాయి. ట్రేడింగ్ ప్రారంభంలోనే సెన్సెక్స్, నిఫ్టీ దాదాపు ఒక శాతం మేర లాభపడ్డాయి.

సెన్సెక్స్ ఉదయం సెషన్‌లో 833 పాయింట్లు (1.08%) పెరిగి 77,746.79 వద్ద ఇంట్రాడే గరిష్ఠాన్ని తాకింది. నిఫ్టీ కూడా 250 పాయింట్లు (1.03%) లాభపడి 24,245.85 స్థాయికి చేరుకుంది. ఆటో, రియల్టీ, మెటల్, ఎఫ్‌ఎంసీజీ, ఎనర్జీ రంగాల షేర్లలో కొనుగోళ్ల ఆసక్తి కనిపించింది. అయితే, కోటక్ మహీంద్రా బ్యాంక్, డాక్టర్ రెడ్డీస్, టీసీఎస్, ఐటీసీ, భారతీ ఎయిర్‌టెల్ వంటి కొన్ని షేర్లు నష్టాల్లో పయనించాయి.

పశ్చిమాసియాలో ఉద్రిక్తతల నేపథ్యంలో అమెరికా అధ్యక్షుడు డొనాల్డ్ ట్రంప్ చేసిన వ్యాఖ్యలు మార్కెట్లపై సానుకూల ప్రభావం చూపాయి. హర్మూజ్ జలసంధిలో చిక్కుకున్న నౌకలకు మానవతా దృక్పథంతో సాయం చేస్తామని ట్రంప్ ప్రకటించారు. ఇది అంతర్జాతీయంగా చమురు ధరలు తగ్గడానికి కారణమైంది. బ్రెంట్ క్రూడ్ బ్యారెల్ ధర 0.61% తగ్గి 107.51 డాలర్లకు, డబ్ల్యూటీఐ క్రూడ్ ధర 2.77% తగ్గి 99.11 డాలర్లకు చేరింది.

దేశీయంగా తమిళనాడు, పశ్చిమ బెంగాల్ సహా నాలుగు రాష్ట్రాలు, ఒక కేంద్రపాలిత ప్రాంతం అసెంబ్లీ ఎన్నికల ఫలితాలు వెలువడుతుండటం కూడా మార్కెట్ సెంటిమెంట్‌ను ప్రభావితం చేస్తోంది. ఆసియా మార్కెట్లైన జపాన్ నిక్కీ, హాంకాంగ్ హాంగ్‌సెంగ్, దక్షిణ కొరియా కోస్పి కూడా 4 శాతం వరకు లాభాల్లో ట్రేడ్ అవుతున్నాయి.