ఐపీఎల్‌లో నమ్మలేని ఘటన.. మార్క్ వుడ్‌కు ఓనర్ వింత ఆఫర్!

ఐపీఎల్ గురించి ఇంగ్లండ్ ఫాస్ట్ బౌలర్ మార్క్ వుడ్ ఒక సంచలన విషయాన్ని బయటపెట్టాడు. తాను తీవ్ర అనారోగ్యంతో బాధపడుతున్నప్పటికీ, ఒక ఫ్రాంచైజీ యజమాని మ్యాచ్ ఆడేందుకు తనను ప్రైవేట్ విమానంలో పంపిస్తానని ఆఫర్ చేశాడని వెల్లడించాడు. ఇటీవల బీబీసీకి చెందిన 'స్ట్రాటజిక్ టైమౌట్' అనే పాడ్‌కాస్ట్‌లో మాట్లాడుతూ వుడ్ ఈ ఆశ్చర్యకరమైన అనుభవాన్ని పంచుకున్నాడు.

ఒక ఐపీఎల్ సీజన్‌లో ఐదు మ్యాచ్‌ల తర్వాత తనకు తీవ్రమైన జ్వరం వచ్చిందని, కనీసం మంచం మీద నుంచి లేవలేని స్థితిలో ఉన్నానని మార్క్ వుడ్ తెలిపాడు. "ప్రతి అరగంటకు ఒకసారి డాక్టర్ నా గదికి వచ్చి ఆరోగ్యాన్ని పర్యవేక్షించేవారు. ఆ సమయంలో ఫ్రాంచైజీ యజమాని ఫోన్ చేసి 'ఎలా ఉంది? ఆడేందుకు సిద్ధంగా ఉన్నావా?' అని అడిగారు. నేను ఏమీ తినలేదని, తాగలేదని, మంచం మీద నుంచి లేవలేకపోతున్నానని చెప్పాను. దానికి ఆయన, 'మరో డాక్టర్‌ను పిలిపిద్దాం, అన్నీ చూసుకుందాం' అన్నారు" అని వుడ్ వివరించాడు.

ఆ మరుసటి రోజు యజమాని మళ్లీ ఫోన్ చేసి, "నేను ఒక ప్రైవేట్ విమానం పంపిస్తాను. నువ్వు అందులో వచ్చి మ్యాచ్ ఆడు. ఆ తర్వాత వెంటనే అదే విమానంలో నిన్ను తిరిగి నీ బెడ్‌ దగ్గరికి పంపిస్తాను" అని చెప్పినట్టు వుడ్ వెల్లడించాడు. ఆ ప్రతిపాదనకు తాను కూడా కాసేపు టెంప్ట్ అయ్యానని, తన తండ్రితో కూడా చర్చించానని, కానీ చివరికి ఆరోగ్యం దృష్ట్యా ఆ ఆఫర్‌ను తిరస్కరించానని చెప్పాడు. అయితే, ఆ ఫ్రాంచైజీ యజమాని ఎవరనే విషయాన్ని మాత్రం వుడ్ బయటపెట్టలేదు.

మార్క్ వుడ్ తన ఐపీఎల్ కెరీర్‌లో 2018లో చెన్నై సూపర్ కింగ్స్, 2023లో లక్నో సూపర్ జెయింట్స్ జట్లకు ప్రాతినిధ్యం వహించాడు. లక్నో తరఫున కేవలం 4 మ్యాచ్‌లలోనే 11 వికెట్లు పడగొట్టి అద్భుత ప్రదర్శన చేశాడు.