సినీ గీత రచయిత చంద్రబోస్ కుటుంబంలో తీవ్ర విషాదం

ప్రముఖ సినీ గీత రచయిత, ఆస్కార్ అవార్డు గ్రహీత చంద్రబోస్ ఇంట తీవ్ర విషాదం చోటుచేసుకుంది. ఆయన సోదరుడు రాజేంద్ర (60) గుండెపోటుతో హఠాన్మరణం చెందారు. ఈ ఘటన అన్నమయ్య జిల్లా కలికిరిలో ఆదివారం ఉదయం జరిగింది.

వివరాల్లోకి వెళితే, వ్యాపార పనుల నిమిత్తం బెంగళూరు నుంచి వచ్చిన రాజేంద్ర, శనివారం రాత్రి కలికిరిలోని తన స్నేహితుడు శ్రీనివాసరెడ్డి ఇంట్లో బస చేశారు. ఆదివారం ఉదయం ఆయనకు అస్వస్థతగా అనిపించడంతో, స్థానిక ప్రైవేటు ఆస్పత్రిలో ప్రాథమిక చికిత్స తీసుకున్నారు. అనంతరం, కలికిరి క్రాస్ రోడ్డు వద్ద ఉన్న ఓ హోటల్‌లో టిఫిన్ చేస్తుండగా ఆయనకు ఒక్కసారిగా గుండెపోటు వచ్చింది. దీంతో అక్కడికక్కడే కుప్పకూలి ప్రాణాలు విడిచారు.

ఈ సమాచారం అందుకున్న కలికిరి పోలీసులు వెంటనే ఘటనా స్థలానికి చేరుకుని, విషయాన్ని చంద్రబోస్ కుటుంబ సభ్యులకు తెలియజేశారు. రాజేంద్ర ఆకస్మిక మృతితో కలికిరి పట్టణంలో విషాద ఛాయలు అలుముకున్నాయి. అవసరమైన వైద్య పరీక్షల అనంతరం మృతదేహాన్ని కుటుంబసభ్యులకు అప్పగించినట్లు సమాచారం.