ఈ సీజన్ మాది కాదు.. ఓటమి తర్వాత చేతులెత్తేసిన హార్దిక్ పాండ్యా!

చెన్నై సూపర్ కింగ్స్‌తో జరిగిన మ్యాచ్‌లో ఘోర ఓటమి తర్వాత ముంబై ఇండియన్స్ కెప్టెన్ హార్దిక్ పాండ్యా దాదాపు చేతులెత్తేశాడు. ఈ సీజన్ తమకు ఏమాత్రం కలిసి రాలేదని, ఆశించిన స్థాయిలో ఆడలేకపోయామని అంగీకరించాడు. శనివారం జరిగిన ఈ మ్యాచ్‌లో ఓటమితో 9 మ్యాచ్‌లలో 7 పరాజయాలను మూటగట్టుకున్న ముంబై జట్టు ప్లేఆఫ్స్ ఆశలను మరింత సంక్లిష్టం చేసుకుంది.

ఓటమి అనంతరం హార్దిక్ పాండ్యా మాట్లాడుతూ "ఇది కేవలం ఈ రాత్రికి సంబంధించిన ఓటమి కాదు, మొత్తం సీజన్‌లోనే మేం విఫలమయ్యాం" అని నిరాశ వ్యక్తం చేశాడు. తమ కంటే చెన్నై జట్టే మెరుగ్గా ఆడిందని, బౌలింగ్, బ్యాటింగ్, ఫీల్డింగ్.. ఇలా అన్ని విభాగాల్లోనూ రాణించిందని ప్రశంసించాడు. "ఒక దశలో 180-190 స్కోరు వస్తుందనుకున్నాం. కానీ 10 ఓవర్ల తర్వాత మేం ఊపందుకోలేకపోయాం. వాళ్లు అద్భుతంగా బౌలింగ్ చేశారు. వాళ్లను ఔట్ చేయడానికి మేం ఫైర్‌బాల్స్ వేయాల్సి వచ్చేది. వాళ్లు స్మార్ట్ క్రికెట్ ఆడారు, వాళ్లదే మెరుగైన జట్టు" అని హార్దిక్ వివరించాడు.

160 పరుగుల లక్ష్యంతో బరిలోకి దిగిన చెన్నై, కెప్టెన్ రుతురాజ్ గైక్వాడ్ (48 బంతుల్లో 67 నాటౌట్), యువ ఆటగాడు కార్తీక్ (40 బంతుల్లో 50 నాటౌట్) అద్భుత ప్రదర్శనతో సునాయాసంగా విజయం సాధించింది. వీరిద్దరూ మూడో వికెట్‌కు 98 పరుగుల అజేయ భాగస్వామ్యం నెలకొల్పి, మరో 11 బంతులు మిగిలి ఉండగానే జట్టును గెలిపించారు.

వికెట్ల పరంగా ముంబైపై చెన్నైకి ఇదే అతిపెద్ద విజయం కావడం గమనార్హం. 2014, 2023 తర్వాత ముంబైపై చెన్నై లీగ్ డబుల్ సాధించడం ఇది మూడోసారి. అంతేకాకుండా, కార్తీక్ (20 ఏళ్ల 6 రోజులు) ఐపీఎల్‌లో చెన్నై తరఫున హాఫ్ సెంచరీ చేసిన రెండో పిన్నవయస్కుడిగా రికార్డు సృష్టించాడు.