హైదరాబాద్‌పై కాసాగ్రాండ్ భారీ ప్లాన్.. నగరంలో అతిపెద్ద విల్లా ప్రాజెక్ట్ 'వైబ్' ప్రారంభం

ప్రముఖ రియల్ ఎస్టేట్ సంస్థ కాసాగ్రాండ్, వేగంగా అభివృద్ధి చెందుతున్న హైదరాబాద్ మార్కెట్‌లో తన కార్యకలాపాలను భారీగా విస్తరిస్తోంది. ఇందులో భాగంగా నగరంలో ఏకంగా 3.98 మిలియన్ చదరపు అడుగుల మేర కొత్త ప్రాజెక్టులను చేపట్టనున్నట్టు ప్రకటించింది. ఈ విస్తరణ ప్రణాళికలో భాగంగా, రాజేంద్రనగర్‌లో 'కాసాగ్రాండ్ వైబ్' పేరుతో ఒక భారీ ప్రీమియం విల్లా కమ్యూనిటీ ప్రాజెక్టును ఆవిష్కరించింది. ఇది హైదరాబాద్‌లో కంపెనీకి అతిపెద్ద నివాస ప్రాజెక్ట్ కాగా, సంస్థ మొత్తం పోర్ట్‌ఫోలియోలో రెండవ అతిపెద్దది కావడం విశేషం.

పశ్చిమ హైదరాబాద్‌లోని రాజేంద్రనగర్‌లో 35 ఎకరాల విస్తీర్ణంలో 'కాసాగ్రాండ్ వైబ్' ప్రాజెక్టును అభివృద్ధి చేస్తున్నారు. ఇందులో 5 బీహెచ్‌కే కాన్ఫిగరేషన్‌తో మొత్తం 362 విలాసవంతమైన విల్లాలను నిర్మించనున్నారు. ఈ విల్లాల ప్రారంభ ధర రూ. 3.2 కోట్లుగా నిర్ణయించారు. ఈ ప్రాజెక్ట్ పీవీఎన్ఆర్ ఎక్స్‌ప్రెస్‌వే నుంచి కేవలం 5 నిమిషాల దూరంలో, ఎయిర్‌పోర్ట్ నుంచి 15-20 నిమిషాల ప్రయాణ దూరంలో ఉండటం గమనార్హం.

ఈ ప్రాజెక్టులో కొనుగోలుదారుల ఆధునిక జీవనశైలికి అనుగుణంగా 93కి పైగా ఇండోర్, అవుట్‌డోర్ సదుపాయాలను కల్పిస్తున్నారు. 40,000 చదరపు అడుగుల విస్తీర్ణంలో రెండు  భారీ క్లబ్‌హౌస్‌లు ఏర్పాటు చేయనున్నారు.  ఈ ప్రాజెక్టును 36 నెలల్లో, అంటే 2029 ఏప్రిల్ నాటికి పూర్తి చేసి కొనుగోలుదారులకు అప్పగించాలని లక్ష్యంగా పెట్టుకున్నారు.

పెరుగుతున్న డిమాండ్‌కు అనుగుణంగా..

హైదరాబాద్‌లో ఐటీ, ఐటీఈఎస్ రంగాల వృద్ధి, మౌలిక సదుపాయాల విస్తరణ కారణంగా లగ్జరీ, ప్రీమియం ఇళ్లకు డిమాండ్ గణనీయంగా పెరిగింది. ఈ అవకాశాన్ని అందిపుచ్చుకునేందుకు కాసాగ్రాండ్ ఇక్కడ భారీగా పెట్టుబడులు పెడుతోంది. కాసగ్రాండ్ డిప్యూటీ మేనేజింగ్ డైరెక్టర్ సతీశ్ సీజీ మాట్లాడుతూ, "హైదరాబాద్ గృహ కొనుగోలుదారులు ప్రధానంగా విశాలమైన స్థలం, అత్యున్నత సదుపాయాలతో కూడిన లగ్జరీని కోరుకుంటున్నారు," అని తెలిపారు. వారి అంచనాలకు తగినట్టుగానే ఈ ప్రాజెక్టును తీర్చిదిద్దుతున్నామని ఆయన వివరించారు.

2023లో హైదరాబాద్ మార్కెట్లోకి ప్రవేశించిన చెన్నైకి చెందిన ఈ సంస్థ, ఐపీవోకు కూడా సిద్ధమవుతోంది. ప్రస్తుతం కంపెనీ మొత్తం ఆదాయంలో హైదరాబాద్ నుంచే 12-15 శాతం వాటా వస్తుండటంతో, భవిష్యత్తులో ఇక్కడ మరిన్ని ప్రాజెక్టులు చేపట్టేందుకు ప్రణాళికలు రచిస్తోంది. ఈ కొత్త ప్రాజెక్టుతో భాగ్యనగర రియల్ ఎస్టేట్ రంగంలో కాసగ్రాండ్ తన స్థానాన్ని మరింత పటిష్టం చేసుకోనుంది.