దీర్ఘాయువుకు వ్యాయామం ఒక్కటే కాదు.. మీ వర్కౌట్‌లో ఈ మార్పులు చేయండి!

మీరు ఏళ్ల తరబడి ఒకే రకమైన వర్కౌట్ రొటీన్‌ను అనుసరిస్తున్నారా? అయితే, మీ పద్ధతిని పునఃపరిశీలించుకోవాల్సిన సమయం వచ్చిందని ఒక కొత్త అధ్యయనం స్పష్టం చేస్తోంది. కేవలం ఎంత సేపు వ్యాయామం చేశామన్నదే కాకుండా, అందులో ఎంత వైవిధ్యం ఉందనేది కూడా మన ఆయుష్షును నిర్ణయించడంలో ముఖ్యపాత్ర పోషిస్తుందని 'బీఎంజే మెడిసిన్' జర్నల్‌లో ప్రచురితమైన ఈ పరిశోధన స్ప‌ష్టం చేసింది. విభిన్న రకాల శారీరక శ్రమల్లో క్రమం తప్పకుండా పాల్గొనడం వల్ల అకాల మరణాల ముప్పు తగ్గుతుందని ఈ అధ్యయనంలో వెల్లడైంది.

పరిశోధనలో కీలక అంశాలు
ఈ అధ్యయనం కోసం పరిశోధకులు 'నర్స్ హెల్త్ స్టడీ', 'హెల్త్ ప్రొఫెషనల్స్ ఫాలో-అప్ స్టడీ' నుంచి దాదాపు 1,70,000 మందికి పైగా వ్యక్తుల సమాచారాన్ని 30 ఏళ్ల పాటు విశ్లేషించారు. పాల్గొన్న వారు తాము చేసే నడక, రన్నింగ్, సైక్లింగ్, స్విమ్మింగ్, టెన్నిస్, స్ట్రెంగ్త్ ట్రైనింగ్, యోగా వంటి అనేక కార్యకలాపాల వివరాలను నివేదించారు. ఈ సమాచారం ఆధారంగా శక్తి వినియోగాన్ని అంచనా వేసే మెటబాలిక్ ఈక్వివలెంట్ ఆఫ్ టాస్క్ (ఎంఈటీ) స్కోర్‌లను లెక్కించారు.

ఈ అధ్యయనంలో అత్యంత ముఖ్యమైన విషయం ఏమిటంటే, వ్యాయామంలో వైవిధ్యం ప్రాముఖ్యత. తాము చేసే మొత్తం వ్యాయామ సమయంతో సంబంధం లేకుండా, విభిన్న రకాల శారీరక శ్రమల్లో పాల్గొన్న వారిలో అన్ని కారణాల వల్ల కలిగే మరణాల ముప్పు 19శాతం తక్కువగా ఉన్నట్లు పరిశోధకులు కనుగొన్నారు. ఇది వివిధ కండరాల సమూహాలను ఉత్తేజితం చేయడం, మొత్తం ఫిట్‌నెస్‌ను మెరుగుపరచడం ద్వారా ప్రత్యేక ప్రయోజనాలను అందిస్తుందని సూచిస్తోంది.

ఏ వ్యాయామాలతో ఎక్కువ ప్రయోజనం?
అధ్యయనం ప్రకారం కొన్ని నిర్దిష్ట వ్యాయామాలు మరణాల ముప్పును తగ్గించడంలో మరింత ప్రభావవంతంగా ఉన్నాయి.
నడక: 17శాతం తక్కువ ముప్పు
టెన్నిస్, రాకెట్ స్పోర్ట్స్: 15శాతం తక్కువ ముప్పు
రోయింగ్ లేదా కాలిస్థెనిక్స్: 14శాతం తక్కువ ముప్పు
స్ట్రెంగ్త్ ట్రైనింగ్, రన్నింగ్: 13శాతం తక్కువ ముప్పు
మెట్లు ఎక్కడం: 10శాతం తక్కువ ముప్పు

అంతేగాక‌ వారానికి సుమారు 20 ఎంఈటీ గంటల వ్యాయామం తర్వాత ఆరోగ్య ప్రయోజనాలు ఒక స్థిర స్థాయికి చేరుకుంటాయని, ఆ తర్వాత అధికంగా శ్రమించినా దీర్ఘాయువు విషయంలో అదనపు ప్రయోజనాలు పెద్దగా ఉండకపోవచ్చని పరిశోధకులు గుర్తించారు.

ఆరోగ్యకరమైన జీవనశైలి కూడా ముఖ్యం
శారీరకంగా చురుకుగా ఉండే వ్యక్తులు సాధారణంగా ఆరోగ్యకరమైన జీవనశైలిని కలిగి ఉంటారని ఈ అధ్యయనం పేర్కొంది. వారు సరైన బరువును కలిగి ఉండటం, సమతుల్య ఆహారం తీసుకోవడం, ధూమపానానికి దూరంగా ఉండటం, సామాజికంగా చురుకుగా ఉండటం వంటివి గమనించారు. అంటే వ్యాయామం అనేది విస్తృతమైన ఆరోగ్యకరమైన జీవన విధానంలో ఒక భాగమని అర్థమవుతోంది.

ఈ అధ్యయనానికి కొన్ని పరిమితులు ఉన్నప్పటికీ (స్వీయ-నివేదిత సమాచారం, జనాభా వైవిధ్యం తక్కువగా ఉండటం), దాని భారీ నమూనా పరిమాణం, సుదీర్ఘకాలం పాటు కొనసాగడం వల్ల ఫలితాలు ఎంతో ప్రాధాన్యత సంతరించుకున్నాయి.

మీరు చేయాల్సింది ఇదే
ఈ పరిశోధన సారాంశం ఒక్కటే.. కేవలం ఎక్కువ కదలడం కాదు, విభిన్నంగా కదలండి. ప్రతిరోజూ ఒకే వ్యాయామాన్ని పునరావృతం చేయడానికి బదులుగా, మీ దినచర్యలో కార్డియో, స్ట్రెంగ్త్ ట్రైనింగ్, యోగా వంటి ఫ్లెక్సిబిలిటీ వ్యాయామాలు, ఇష్టమైన క్రీడలు వంటి వాటిని చేర్చుకోవడం మంచిది. ఇది మీ వ్యాయామాన్ని ఆసక్తికరంగా మార్చడమే కాకుండా, దీర్ఘకాలిక ఆరోగ్యం, ఆయుష్షును పెంపొందించడంలో సహాయపడుతుంది.