విండోస్ 11 యూజర్లను చాలాకాలంగా వేధిస్తున్న అప్‌డేట్ సమస్యలకు పరిష్కారం చూపే దిశగా మైక్రోసాఫ్ట్ కీలక అడుగులు వేస్తోంది. బలవంతపు అప్‌డేట్లకు చెక్ పెడుతూ, యూజర్ల చేతికి పూర్తి నియంత్రణ ఇచ్చేలా కొత్త ఫీచర్లను పరీక్షిస్తోంది. అదే సమయంలో, ఏప్రిల్ నెలలో విడుదల చేసిన ఓ సెక్యూరిటీ అప్‌డేట్ వల్ల తలెత్తిన సమస్యలనూ పరిష్కరించే పనిలో పడింది.

వివరాల్లోకి వెళ్తే, విండోస్ 11 కోసం ఏప్రిల్‌లో విడుదల చేసిన KB5083769 సెక్యూరిటీ అప్‌డేట్ కొందరు యూజర్లకు తీవ్ర ఇబ్బందులు సృష్టిస్తోంది. ఈ అప్‌డేట్ ఇన్‌స్టాల్ చేశాక కొన్ని కంప్యూటర్లు పదేపదే బూట్ అవ్వడం (బూట్ లూప్స్), బ్లూ స్క్రీన్ ఆఫ్ డెత్ (BSOD) వంటి సమస్యలు ఎదురవుతున్నాయని, ముఖ్యంగా హెచ్‌పీ, డెల్ సిస్టమ్స్‌లో ఈ సమస్య ఎక్కువగా ఉందని యూజర్లు రిపోర్ట్ చేస్తున్నారు. అయితే, కొన్ని ప్రత్యేక గ్రూప్ పాలసీ కాన్ఫిగరేషన్లు ఉన్న డివైజ్‌లలో బిట్‌లాకర్ రికవరీ సమస్య వస్తోందని మైక్రోసాఫ్ట్ అధికారికంగా అంగీకరించింది.

ఈ నేపథ్యంలో, యూజర్ల ఫీడ్‌బ్యాక్‌కు స్పందిస్తూ మైక్రోసాఫ్ట్ కొత్త అప్‌డేట్ కంట్రోల్ ఫీచర్లను 'విండోస్ ఇన్‌సైడర్ ప్రోగ్రామ్'లో పరీక్షిస్తోంది. దీని ప్రకారం, యూజర్లు అప్‌డేట్లను 35 రోజుల వరకు పాజ్ చేయొచ్చు. ఈ గడువు ముగిశాక మళ్లీ పాజ్ చేసి, నిరవధికంగా వాయిదా వేసుకోవచ్చు. అలాగే, కంప్యూటర్ షట్‌డౌన్ లేదా రీస్టార్ట్ చేసేటప్పుడు అప్‌డేట్ తప్పనిసరి కాకుండా, సాధారణ ఆప్షన్లు కూడా అందుబాటులో ఉంటాయి. ప్రస్తుతం ఈ కొత్త ఫీచర్లు టెస్టింగ్ దశలో ఉండగా, త్వరలోనే సాధారణ యూజర్లందరికీ అందుబాటులోకి వచ్చే అవకాశం ఉంది.