రైల్వే క్రాసింగ్‌ను హర్మూజ్ జలసంధితో పోల్చాడని... పాకిస్థాన్ పౌరుడి అరెస్ట్

పాకిస్థాన్‌ రాజధాని ఇస్లామాబాద్‌లో ఒక విచిత్ర ఘటన చోటుచేసుకుంది. స్థానిక రైల్వే క్రాసింగ్‌పై సోషల్ మీడియాలో వ్యంగ్యంగా పోస్ట్ పెట్టాడన్న కారణంతో పోలీసులు ఒక వ్యక్తిని అరెస్ట్ చేశారు. అంతేకాదు, అతనిపై జీవిత ఖైదు విధించే తీవ్రమైన సెక్షన్ల కింద కేసులు నమోదు చేయడం తీవ్ర విమర్శలకు దారితీసింది.

వివరాల్లోకి వెళితే, ఇస్లామాబాద్‌లోని టార్నోల్ రైల్వే క్రాసింగ్ వద్ద రైలు వెళుతున్న కారణంగా ట్రాఫిక్ నిలిచిపోయింది. దీంతో విసుగు చెందిన ఓ వ్యక్తి, "టార్నోల్ రైల్వే క్రాసింగ్, హర్మూజ్ జలసంధికి ఏమాత్రం తక్కువ కాదు. దీన్ని మూసేస్తే మన సమస్యలన్నీ తీరిపోతాయి" అంటూ సోషల్ మీడియాలో పోస్ట్ చేశాడు. దీనిని కేవలం హాస్యం కోసమే చేసినట్లు అతను భావించినా, ఇస్లామాబాద్ పోలీసులు మాత్రం దీన్ని తీవ్రంగా పరిగణించారు.

ప్రభుత్వ ఆదేశాలను ఉల్లంఘించడం, జీవిత ఖైదుతో శిక్షించదగిన నేరానికి పాల్పడటం వంటి తీవ్రమైన అభియోగాలతో అతనిపై ఫస్ట్ ఇన్ఫర్మేషన్ రిపోర్ట్ (ఎఫ్ఐఆర్) నమోదు చేసి అరెస్ట్ చేశారు.

ప్రస్తుతం ఇస్లామాబాద్‌లో విదేశీ ప్రముఖుల పర్యటనల కారణంగా కఠినమైన భద్రతా ఆంక్షలు అమలులో ఉన్నాయి. ఏప్రిల్ 19 నుంచి ఇస్లామాబాద్, రావల్పిండి నగరాల్లో ప్రజా, సరుకు రవాణాను నిలిపివేసినట్లు జియో న్యూస్ తెలిపింది. ఈ నేపథ్యంలోనే పోలీసులు అతిగా స్పందించారని స్థానిక మీడియా విమర్శిస్తోంది.

ప్రముఖ పత్రిక 'డాన్' తన సంపాదకీయంలో పోలీసుల చర్యను తీవ్రంగా తప్పుబట్టింది. "ఒక వ్యంగ్య పోస్ట్‌కు, భద్రతా ముప్పునకు మధ్య తేడాను గుర్తించలేని స్థితిలో ప్రభుత్వం ఉండటం సరికాదు. ఆ వ్యక్తి వల్ల తక్షణ ముప్పు ఉందని నిరూపించలేనంత వరకు, ఈ కఠిన చర్యకు గాను అతనికి క్షమాపణ చెప్పాలి" అని పేర్కొంది. ఈ కేసును కొట్టివేయడం ద్వారా ప్రభుత్వానికి ఇంకా విచక్షణ మిగిలి ఉందని నిరూపించుకోవాలని హితవు పలికింది.