హార్దిక్ పాండ్యా డబ్బా కెప్టెన్సీ వల్లే ముంబై ఓడిపోతోంది: కృష్ణమాచారి శ్రీకాంత్

ఐపీఎల్ 2026 సీజన్‌లో ముంబై ఇండియన్స్ (ఏంఐ) ప్రయాణం తీవ్ర ఒడిదొడుకులతో సాగుతోంది. కెప్టెన్ హార్దిక్ పాండ్యా నాయకత్వంలోని ఈ జట్టు, ఆడిన తొలి ఏడు మ్యాచ్‌లలో ఐదింటిలో ఓటమి పాలై పాయింట్ల పట్టికలో వెనుకబడింది. ముఖ్యంగా చెన్నై సూపర్ కింగ్స్ (సీఎస్‌కే)తో జరిగిన మ్యాచ్‌లో 103 పరుగుల భారీ తేడాతో ఓడిపోవడం జట్టును మరింత కష్టాల్లోకి నెట్టింది. ఈ నేపథ్యంలో హార్దిక్ పాండ్యా కెప్టెన్సీ, వ్యక్తిగత ప్రదర్శనపై సర్వత్రా విమర్శలు వెల్లువెత్తుతున్నాయి. తాజాగా భారత మాజీ ఓపెనర్ కృష్ణమాచారి శ్రీకాంత్, హార్దిక్ కెప్టెన్సీపై తీవ్ర స్థాయిలో విరుచుకుపడ్డాడు.

తన యూట్యూబ్ ఛానెల్‌లో మాట్లాడుతూ హార్దిక్ పాండ్యా కెప్టెన్సీని "డబ్బా కెప్టెన్సీ"గా అభివర్ణించారు. ముఖ్యంగా చెన్నైతో మ్యాచ్‌లో టాస్ గెలిచి బౌలింగ్ ఎంచుకోవడాన్ని ఆయన తప్పుబట్టాడు. "ఈ సీజన్‌లో చేజింగ్‌లో కోల్‌కతాపై గెలిచిన ఒకే ఒక్క మ్యాచ్ మినహా, మిగతా అన్నిసార్లూ ముంబై ఓడిపోయింది. అయినా కూడా హార్దిక్ బౌలింగ్ ఎంచుకోవడం అర్థరహితం. ముందుగా బ్యాటింగ్ చేసి ఉంటే, తిలక్ వర్మ లేదా సంజూ శాంసన్ లాగా ఎవరైనా ఒకరు ఒంటిచేత్తో మ్యాచ్ గెలిపించే అవకాశం ఉండేది. హార్దిక్ ఆ విషయంలో కూడా తప్పు చేశాడు" అని శ్రీకాంత్ విశ్లేషించాడు.

చెన్నైతో మ్యాచ్‌లో హార్దిక్ పాండ్యా బౌలింగ్ ప్రదర్శనను శ్రీకాంత్ తీవ్రంగా విమర్శించాడు. ఆ మ్యాచ్‌లో హార్దిక్ రెండు ఓవర్లలో ఏకంగా 38 పరుగులు సమర్పించుకున్నాడు. దీంతో కీలకమైన డెత్ ఓవర్లలో బౌలింగ్ చేయకుండా, ఆ బాధ్యతను 21 ఏళ్ల యువ బౌలర్ క్రిష్ భగత్‌కు అప్పగించాడు. ఈ నిర్ణయంపై శ్రీకాంత్ మండిపడ్డాడు. 

స్పోర్ట్స్‌కీడా కథనం ప్రకారం శ్రీకాంత్ మాట్లాడుతూ.. "టీ20 ప్రపంచకప్‌లో భారత జట్టు కోసం డెత్ ఓవర్లు వేసిన బౌలర్, ఇక్కడ వేయడానికి భయపడుతున్నాడు. ముంబై సమస్య ఇక్కడే మొదలవుతోంది. తన బౌలింగ్ సామర్థ్యంపై అతనికి నమ్మకం లేదు. అందుకే యువ బౌలర్‌కు బంతినిచ్చి చేతులు దులుపుకున్నాడు. పాండ్యా ఇప్పుడు పరుగులిచ్చే బౌలర్‌గా మారిపోయాడు" అని ఘాటుగా వ్యాఖ్యానించాడు.

ఈ సీజన్‌లో ముంబై ఇండియన్స్ కోల్‌కతా నైట్ రైడర్స్‌పై ఆరు వికెట్ల తేడాతో గెలిచి శుభారంభం చేసినా, ఆ తర్వాత వరుసగా నాలుగు మ్యాచ్‌లలో ఓడిపోయింది. గుజరాత్ టైటాన్స్‌పై 99 పరుగుల భారీ విజయంతో తిరిగి గాడిలో పడినట్లు కనిపించినా, చెన్నై చేతిలో ఘోర పరాజయంతో మళ్లీ కష్టాల్లో పడింది. బౌలింగ్‌లోనే కాకుండా బ్యాటింగ్‌లోనూ హార్దిక్ విఫలమవుతున్నాడని, బంతిని బ్యాట్‌కు కనెక్ట్ చేయడానికే ఇబ్బంది పడుతున్నాడని శ్రీకాంత్ విమర్శించాడు. ఈ క్లిష్ట పరిస్థితుల్లో ముంబై ఇండియన్స్ తమ తదుపరి మ్యాచ్‌ను ఏప్రిల్ 29న సన్‌రైజర్స్ హైదరాబాద్‌తో ఆడనుంది. ఈ మ్యాచ్‌లో గెలిచి తిరిగి పుంజుకోవాలని జట్టు భావిస్తోంది.