ఐపీఎల్‌లో హైటెన్షన్.. తిలక్ వర్మ, ఓవర్‌టన్‌ల మధ్య తీవ్ర వాగ్వాదం.. ఇదిగో వీడియో!

ఐపీఎల్ 2026లో ముంబై ఇండియన్స్, చెన్నై సూపర్ కింగ్స్ మధ్య జరిగిన హై-వోల్టేజ్ మ్యాచ్‌లో తీవ్ర ఉద్రిక్తత చోటుచేసుకుంది. వాంఖడే స్టేడియం వేదికగా జరిగిన ఈ పోరులో ముంబై బ్యాటర్ తిలక్ వర్మ, చెన్నై బౌలర్ జామీ ఓవర్‌టన్‌ల మధ్య మైదానంలోనే తీవ్ర వాగ్వాదం జరిగింది. ఈ ఘటనలో సూర్యకుమార్ యాదవ్ కూడా జోక్యం చేసుకోవడంతో పరిస్థితి మరింత వేడెక్కింది. దీనికి సంబంధించిన వీడియో సోషల్ మీడియాలో వైరల్‌గా మారింది.

వివరాల్లోకి వెళితే... ముంబై ఇండియన్స్ ఛేజింగ్ చేస్తున్న సమయంలో ఈ ఘటన చోటుచేసుకుంది. తిలక్ వర్మ ఒక బంతిని ఆడి రెండో పరుగు కోసం ప్రయత్నించాడు. అయితే, క్రీజులో సమన్వయ లోపం కారణంగా సింగిల్‌తో సరిపెట్టుకున్నాడు. ఈ క్రమంలో ఫీల్డర్ జామీ ఓవర్‌టన్ తన దారికి అడ్డుగా నిలబడ్డాడని తిలక్ వర్మ అసహనం వ్యక్తం చేశాడు. "ఫీల్డర్ కనిపించడం లేదు" అని తిలక్ అన్న మాటలు స్టంప్ మైక్‌లో రికార్డయ్యాయి.

దీంతో ఇద్దరి మధ్య మాటల యుద్ధం మొదలైంది. ఒకరిపై ఒకరు మాటలతో విరుచుకుపడ్డారు. పరిస్థితి ఉద్రిక్తంగా మారడంతో తిలక్ కు మద్దతుగా సహచర ఆటగాడు సూర్యకుమార్ యాదవ్ రంగంలోకి దిగి ఓవర్‌టన్‌తో వాదించాడు. వెంటనే అంపైర్లు కల్పించుకుని ఇరు వర్గాలను శాంతింపజేశారు.

అయితే, మ్యాచ్ ముగిసిన తర్వాత ఇద్దరు ఆటగాళ్లు క్రీడా స్ఫూర్తిని ప్రదర్శించారు. కరచాలనం చేసుకుని తమ మధ్య ఉన్న విభేదాలను పక్కనపెట్టారు. మైదానంలో తీవ్రంగా గొడవపడినా, మ్యాచ్ తర్వాత రాజీపడటంతో వివాదం సద్దుమణిగింది. ఈ ఘటనపై అభిమానులు భిన్నాభిప్రాయాలు వ్యక్తం చేస్తున్నారు. ఇది ఆటలో భాగమేనని కొందరు అంటుండగా, మరికొందరు క్రీడా స్ఫూర్తికి విరుద్ధమని వ్యాఖ్యానిస్తున్నారు.