ప్రపంచ వేదికపై 'వారణాసి'.. మెక్సికోలో రేపే తొలి గ్లోబల్ ఈవెంట్!

ప్రపంచవ్యాప్తంగా సినీ అభిమానులు ఆసక్తిగా ఎదురుచూస్తున్న పాన్-వరల్డ్ చిత్రం ‘వారణాసి’ తన అంతర్జాతీయ ప్రచారానికి శ్రీకారం చుట్టింది. ఈ సినిమా తొలి గ్లోబల్ ప్రజెంటేషన్ కోసం మెక్సికో వేదిక కానుంది. రేపు అక్కడ జరగనున్న ప్రతిష్ఠాత్మక CCXP 2026 ఈవెంట్‌లో ‘వారణాసి’ కోసం ఒక ప్రత్యేక ప్యానెల్‌ను ఏర్పాటు చేశారు. ఈ కార్యక్రమంతో సినిమా అంతర్జాతీయ ప్రమోషన్లు అధికారికంగా ప్రారంభం కానున్నాయి.

ఈ వేడుకలో చిత్ర బృందంతో పాటు దర్శకుడు రాజమౌళి కూడా పాల్గొంటారని సమాచారం. ఈ సందర్భంగా సినిమాకు సంబంధించిన ఎక్స్‌క్లూజివ్ ‘బిహైండ్ ది సీన్స్’ (బీటీఎస్‌) వీడియోలను ప్రదర్శించనున్నారు. అలాగే, సినిమా మేకింగ్ విశేషాలను చిత్ర యూనిట్ అక్కడి ప్రేక్షకులతో పంచుకోనుంది. ప్రజెంటేషన్ పూర్తయిన తర్వాత చిత్ర బృందం ఆడియన్స్‌తో నేరుగా ముచ్చటించనుండటం ఈ కార్యక్రమానికి ప్రధాన ఆకర్షణగా నిలవనుంది.

భారతీయ సంస్కృతి, పురాణాల ఆధారంగా తెరకెక్కుతున్న ఈ సినిమాపై ఇప్పటికే ప్రపంచవ్యాప్తంగా భారీ అంచనాలు నెలకొన్నాయి. ఈ ప్రత్యేక ఈవెంట్ ద్వారా గ్లోబల్ ఆడియన్స్‌కు భారతీయ కథను కొత్తగా పరిచయం చేసేందుకు చిత్ర బృందం సిద్ధమైంది.