కేంద్ర ప్రభుత్వ ఉద్యోగులకు శుభవార్త.. పెరిగిన కరవు భత్యం

కేంద్ర ప్రభుత్వ ఉద్యోగులు, పెన్షనర్లకు ఊరటనిస్తూ కేంద్ర ప్రభుత్వం కీలక నిర్ణయం తీసుకుంది. ప్రధాని నరేంద్ర మోదీ అధ్యక్షతన నేడు సమావేశమైన కేంద్ర కేబినెట్, ఉద్యోగుల కరవు భత్యం (డీఏ)ను 2 శాతం పెంచేందుకు ఆమోదం తెలిపింది. ఈ పెంపుతో ఉద్యోగుల జీతాలు, పెన్షనర్ల భత్యం పెరగనుంది. సాధారణంగా ఫిబ్రవరి లేదా మార్చిలో రావాల్సిన ఈ ప్రకటన ఈ ఏడాది ఆలస్యమైంది.

వినియోగదారుల ధరల సూచీ (CPI-IW) ఆధారంగా గత 12 నెలల సగటు ద్రవ్యోల్బణాన్ని అనుసరించి డీఏ పెంపును లెక్కిస్తారు. తాజా పెంపుతో మొత్తం డీఏ 60 శాతానికి చేరినట్లయింది. బ్యాంక్‌బజార్ సీఈఓ అధిల్ శెట్టి మాట్లాడుతూ.. "డీఏ సవరణలు ఒక నిర్దిష్ట ఫార్ములా ప్రకారం జరుగుతాయి. 2016లో 2 శాతంగా ఉన్న డీఏ, గత దశాబ్ద కాలంలో పెరిగిన ద్రవ్యోల్బణాన్ని ప్రతిబింబిస్తూ ఇప్పుడు దాదాపు 60 శాతానికి చేరింది" అని వివరించారు.

అయితే, ఈ స్వల్ప డీఏ పెంపు కన్నా 8వ కేంద్ర వేతన సంఘం ఏర్పాటుపైనే ఉద్యోగ సంఘాలు ఎక్కువగా దృష్టి సారించాయి. వేతనాలు, పెన్షన్లు, సేవా నిబంధనలను సమగ్రంగా సవరించాలని వారు బలంగా కోరుతున్నారు. నేషనల్ కౌన్సిల్-జాయింట్ కన్సల్టేటివ్ మెషినరీ (NC-JCM) ఏప్రిల్ 14న ప్రభుత్వానికి సమర్పించిన మెమొరాండంలో తమ డిమాండ్లను స్పష్టంగా పేర్కొంది.

కనీస మూల వేతనాన్ని రూ.69,000కు పెంచాలని, ఫిట్‌మెంట్ ఫ్యాక్టర్‌ను 3.83గా నిర్ణయించాలని ఉద్యోగ సంఘాలు ప్రధానంగా డిమాండ్ చేస్తున్నాయి. అలాగే, డీఏ 25 శాతానికి చేరినప్పుడల్లా దానిని మూల వేతనంలో విలీనం చేసే పాత విధానాన్ని పునరుద్ధరించాలని కోరుతున్నాయి. ఈ డిమాండ్లను ప్రభుత్వం అంగీకరిస్తే, దేశవ్యాప్తంగా సుమారు 50 లక్షల మంది ఉద్యోగులు, 65 లక్షల మంది పెన్షనర్లకు ప్రయోజనం చేకూరనుంది. ఈ నేపథ్యంలో 2 శాతం డీఏ పెంపు తాత్కాలిక ఊరట మాత్రమేనని, 8వ వేతన సంఘం ఏర్పాటుపైనే తమ ఆశలు పెట్టుకున్నామని ఉద్యోగ సంఘాల నేతలు చెబుతున్నారు.