మోనాలిసా కేసులో బిగ్ ట్విస్ట్.. అరెస్ట్ చేయొద్దంటూ కోర్టు ఆదేశం

కుంభమేళా స్టార్‌గా సోషల్ మీడియాలో వైరల్ అయిన మోనాలిసా భోంస్లే వివాహ వివాదం మరింత సంక్లిష్టంగా మారింది. ఈ కేసులో మోనాలిసాను అరెస్ట్ చేయవద్దని కోర్టు ఆదేశాలు ఉన్నాయని కొచ్చి నగర పోలీసులు స్పష్టం చేశారు. మరోవైపు మధ్యప్రదేశ్ పోలీసులు ఆమె ఆచూకీ కోసం కేరళలో గాలింపు చర్యలను ముమ్మరం చేశారు.

మోనాలిసాను అరెస్ట్ చేయరాదన్న కోర్టు ఉత్తర్వుల విషయాన్ని మధ్యప్రదేశ్ పోలీసులకు అధికారికంగా తెలియజేశామని కొచ్చి పోలీస్ కమిషనర్ కార్యాలయ అధికారులు తెలిపారు. ప్రస్తుతం అంతర్రాష్ట్ర దర్యాప్తులో భాగంగా అవసరమైన సహకారం మాత్రమే అందిస్తున్నామని చెప్పారు. మోనాలిసా పోలీసు రక్షణ కోరినప్పటికీ, దానిపై ఇంకా ఎలాంటి నిర్ణయం తీసుకోలేదు. మధ్యప్రదేశ్ పోలీసు బృందం కొచ్చిలోనే ఉండి పలుచోట్ల గాలిస్తున్నా ఆమె ఆచూకీ లభించలేదు. ఆమెను అదుపులోకి తీసుకోవడం కంటే ముందుగా వాంగ్మూలం నమోదు చేసుకోవడమే తమ లక్ష్యమని అధికారులు చెబుతున్నారు.

వివాహం జరిగే నాటికి మోనాలిసా వయసు 16 సంవత్సరాల 2 నెలలు మాత్రమేనని, పెళ్లి కోసం నకిలీ జనన ధృవీకరణ పత్రం ఉపయోగించారని జాతీయ గిరిజన కమిషన్ (ఎన్‌సీఎస్‌టీ) నిర్ధారించడంతో ఈ కేసు తీవ్రరూపం దాల్చింది. మధ్యప్రదేశ్‌లోని ఆసుపత్రి రికార్డుల ప్రకారం మోనాలిసా పుట్టిన తేదీ 2009 డిసెంబర్ 30గా తేలింది.

ఈ ఆధారాలతో ఆమె భర్త ఫర్మాన్ ఖాన్‌పై మధ్యప్రదేశ్ పోలీసులు కిడ్నాప్ కేసుతో పాటు పోక్సో చట్టం కింద కూడా కేసు నమోదు చేశారు. ఈ వ్యవహారం తీవ్రత దృష్ట్యా కేరళ, మధ్యప్రదేశ్ డీజీపీలు ఢిల్లీలో తమ ఎదుట హాజరు కావాలని జాతీయ కమిషన్ ఆదేశించింది. చట్టపరమైన, అధికార పరిధికి సంబంధించిన అంశాలు ముడిపడి ఉండటంతో ఈ కేసు దర్యాప్తు క్లిష్టంగా మారింది.