రూపాయి విలువ పతనం దెబ్బ.. దిగజారిన భారత ఆర్థిక ర్యాంకు

ప్రపంచంలో నాలుగో అతిపెద్ద ఆర్థిక వ్యవస్థగా ఉన్న భారత్, తాజాగా రెండు స్థానాలు దిగజారి ఆరవ ర్యాంకుకు పడిపోయింది. అంతర్జాతీయ ద్రవ్యనిధి (ఐఎంఎఫ్‌) విడుదల చేసిన తాజా గణాంకాల ప్రకారం జపాన్, బ్రిటన్‌లు భారత్‌ను అధిగమించి వరుసగా నాలుగు, ఐదు స్థానాల్లో నిలిచాయి. భారత జీడీపీ వృద్ధిలో వెనుకబడటం దీనికి కారణం కాదు. అమెరికా-ఇరాన్ యుద్ధం కారణంగా పెరిగిన చమురు ధరలు, డాలర్‌తో పోలిస్తే రూపాయి విలువ భారీగా పతనం కావడమే ఈ మార్పుకు ప్రధాన కారణంగా విశ్లేషకులు చెబుతున్నారు.

అమెరికా-ఇరాన్ మధ్య ఉద్రిక్తతల నేపథ్యంలో అంతర్జాతీయంగా ముడి చమురు ధరలు పెరిగాయి. దిగుమతులపైనే అధికంగా ఆధారపడే భారత్, చమురు కొనుగోలుకు భారీగా డాలర్లను వెచ్చించాల్సి వస్తోంది. దీంతో డాలర్‌కు డిమాండ్ పెరిగి, రూపాయి మారకం విలువ క్షీణించింది. ఫలితంగా డాలర్ల లెక్కల్లో భారత జీడీపీ పరిమాణం తగ్గిపోయి ర్యాంకుపై ప్రభావం చూపింది. ప్రభుత్వ వర్గాలు జీడీపీ అంచనాలను సవరించడం కూడా దీనికి మరో కారణంగా నిలిచింది.

ఐఎంఎఫ్ అనుబంధ సంస్థ 'వరల్డ్ ఎకనామిక్ అవుట్‌లుక్' 2026 లెక్కల ప్రకారం ప్రస్తుతం అమెరికా (30 ట్రిలియన్ డాలర్లు), చైనా (19 ట్రిలియన్ డాలర్లు), జర్మనీ (5 ట్రిలియన్ డాలర్లు) తొలి మూడు స్థానాల్లో సుస్థిరంగా ఉన్నాయి. ఆ తర్వాతి స్థానాల్లో జపాన్ (4.38 ట్రిలియన్ డాలర్లు), బ్రిటన్ (4.27 ట్రిలియన్ డాలర్లు) ఉండగా... భారత్ 4.15 ట్రిలియన్ డాలర్ల జీడీపీతో ఆరో స్థానంలో నిలిచింది.

2022 సెప్టెంబరులో బ్రిటన్‌ను అధిగమించి భారత్ ఐదో అతిపెద్ద ఆర్థిక వ్యవస్థగా అవతరించింది. గతేడాది మే నెలలో నాటి నీతీ ఆయోగ్ సీఈవో బీవీఆర్ సుబ్రహ్మణ్యం, జపాన్‌ను కూడా దాటి భారత్ నాలుగో స్థానానికి చేరిందని ప్రకటించారు. అయితే, తాజా పరిణామాలతో ఆ స్థానాన్ని కోల్పోవాల్సి వచ్చింది. కాగా, జపాన్, బ్రిటన్, భారత్ జీడీపీల మధ్య వ్యత్యాసం చాలా స్వల్పంగానే ఉంది. రూపాయి మారకం విలువ తిరిగి స్థిరపడితే, భారత్ మళ్లీ నాలుగో స్థానాన్ని దక్కించుకోవడం పెద్ద కష్టమేమీ కాదని, వచ్చే ఏడాదే ఇది సాధ్యపడవచ్చని నిపుణులు అభిప్రాయపడుతున్నారు.