గిల్ కెప్టెన్ ఇన్నింగ్స్... ఉత్కంఠ పోరులో కోల్‌కతాపై గుజరాత్ విక్టరీ

ఐపీఎల్ 2026లో భాగంగా కోల్‌కతా నైట్ రైడర్స్‌తో జరిగిన ఉత్కంఠ పోరులో గుజరాత్ టైటాన్స్ 5 వికెట్ల తేడాతో విజయం సాధించింది. కెప్టెన్ శుభ్‌మన్ గిల్ (86; 50 బంతుల్లో 8 ఫోర్లు, 4 సిక్సర్లు) ఆడిన అద్భుతమైన ఇన్నింగ్స్ గుజరాత్ విజయంలో కీలకపాత్ర పోషించింది. 181 పరుగుల లక్ష్యంతో బరిలోకి దిగిన గుజరాత్, మరో రెండు బంతులు మిగిలి ఉండగానే 19.4 ఓవర్లలో 5 వికెట్లు కోల్పోయి లక్ష్యాన్ని ఛేదించింది.

లక్ష్య ఛేదనలో గుజరాత్ టైటాన్స్‌కు మంచి ఆరంభం లభించింది. కెప్టెన్ గిల్ ఆరంభం నుంచే దూకుడుగా ఆడాడు. సాయి సుదర్శన్ (22), జోస్ బట్లర్ (25) వేగంగా పరుగులు సాధించి ఔటయ్యారు. ఆ తర్వాత గిల్ బాధ్యతాయుతంగా ఆడి జట్టును విజయానికి చేరువ చేశాడు. గిల్ ఔటైన తర్వాత కాస్త ఉత్కంఠ నెలకొన్నప్పటికీ, రాహుల్ తెవాటియా, షారుఖ్ ఖాన్ మిగిలిన లాంఛనాన్ని పూర్తి చేసి జట్టుకు విజయాన్ని అందించారు. కోల్‌కతా బౌలర్లలో వరుణ్ చక్రవర్తి రెండు వికెట్లు తీశాడు.

అంతకుముందు, టాస్ గెలిచి మొదట బ్యాటింగ్ చేసిన కోల్‌కతా, కామెరూన్ గ్రీన్ (79 పరుగులు; 55 బంతుల్లో 7 ఫోర్లు, 4 సిక్సర్లు) ఒంటరి పోరాటంతో నిర్ణీత 20 ఓవర్లలో 180 పరుగులకు ఆలౌట్ అయింది. కెప్టెన్ రహానే డకౌట్ కాగా, ఇతర బ్యాటర్లు విఫలమయ్యారు. రోవ్‌మన్ పావెల్ (27), రమణ్ దీప్ సింగ్ (17) కాసేపు గ్రీన్‌కు సహకరించారు. గుజరాత్ బౌలర్లలో కగిసో రబాడ 3 వికెట్లతో సత్తా చాటగా, మహమ్మద్ సిరాజ్ పొదుపుగా బౌలింగ్ చేసి 2 వికెట్లు పడగొట్టాడు.