బుమ్రాకు ఏమైంది? వికెట్ల వేటలో వెనకబడ్డ బౌలింగ్ కింగ్.. ఇర్ఫాన్ పఠాన్ విశ్లేషణ

ఐపీఎల్ అంటేనే పరుగుల ప్రవాహం.. కానీ, ఆ పరుగులకు అడ్డుకట్ట వేయడంలో దిట్ట అయిన 'యార్కర్ కింగ్' జస్‌ప్రీత్ బుమ్రా ఇప్పుడు తడబడుతున్నాడు. సాధారణంగా బుమ్రా స్పెల్ పడుతుందంటే బ్యాటర్లు వణికిపోతారు. కానీ తాజా సీజన్ గణాంకాలు మాత్రం అందుకు భిన్నంగా ఉన్నాయి. వరుసగా ఐదు మ్యాచుల్లో బరిలోకి దిగిన బుమ్రా, ఒక్క వికెట్ కూడా తీయలేకపోవడం అభిమానులను ఆందోళనకు గురిచేస్తోంది. కేవలం వికెట్లు పడకపోవడమే కాదు, 8.63 ఎకానమీతో పరుగులు సమర్పించడం ఆయన స్థాయికి తగని ప్రదర్శనగా కనిపిస్తోంది. ఇదే దారిలో కోల్‌కతా మిస్టరీ స్పిన్నర్ వరుణ్ చక్రవర్తి కూడా మూడు మ్యాచులు ఆడి ఒక్క వికెట్ ఖాతాలో వేసుకోలేక చతికిలపడ్డాడు.

బుమ్రా వైఫల్యంపై టీమ్ ఇండియా మాజీ ఆల్‌రౌండర్ ఇర్ఫాన్ పఠాన్ ఆసక్తికర విశ్లేషణ చేశారు. బుమ్రా బౌలింగ్‌లో వేగం తగ్గడమే ప్రధాన సమస్య అని ఆయన అభిప్రాయపడ్డారు. ప్రస్తుతం బుమ్రా సగటు వేగం కేవలం 130 కి.మీ మాత్రమే ఉండటం ఆశ్చర్యకరం. "బుమ్రా తన కోటాను పూర్తి చేసే క్రమంలో దాదాపు 44 శాతం స్లో బంతులనే సంధిస్తున్నాడు. అంటే ప్రతి రెండు బంతుల్లో ఒకటి స్లో బాల్ వస్తోంది. ఇలా ఎక్కువగా స్లో బంతులపై ఆధారపడటం వల్ల వికెట్లు రావడం కష్టమవుతోంది" అని పఠాన్ విశ్లేషించారు. స్పీడ్‌ను పెంచి, అడపాదడపా మాత్రమే స్లో బంతులను వేస్తే ప్రత్యర్థి బ్యాటర్లు ఇబ్బంది పడతారని, ఇది చాలా చిన్న మార్పు అని ఆయన సూచించారు.

ముఖ్యంగా పంజాబ్‌తో జరిగిన తాజా మ్యాచ్‌లో బుమ్రా 4 ఓవర్లలో 41 పరుగులు ఇచ్చినా ఒక్క వికెట్ తీయలేకపోవడం ఆయన ప్రస్తుత ఫామ్‌ను వెక్కిరిస్తోంది. ప్రభ్‌ సిమ్రన్ వంటి కుర్రాళ్లు సైతం బుమ్రా బౌలింగ్‌ను అలవోకగా ఆడేస్తుండటం గమనార్హం. రాజస్థాన్‌తో జరిగిన పోరులో తన తొలి బంతినే వైభవ్ సూర్యవంశీ బౌండరీకి పంపడం బుమ్రా ఆత్మవిశ్వాసాన్ని దెబ్బతీసే అంశమే. ప్రపంచ మేటి బౌలర్‌గా పేరున్న బుమ్రా, తన సహజ సిద్ధమైన వేగాన్ని నమ్ముకుని మళ్లీ ట్రాక్‌లోకి వస్తాడని క్రికెట్ ప్రేమికులు ఆశిస్తున్నారు.