రానున్నది మరింత కఠిన వేసవి.. హెచ్చరిస్తున్న వాతావరణ నిపుణులు

ఆంధ్రప్రదేశ్‌ను తీవ్రమైన ఎండలు, వడగాల్పులు ఉక్కిరిబిక్కిరి చేస్తున్నాయి. రాష్ట్రంలోని అనేక ప్రాంతాల్లో ఉష్ణోగ్రతలు రికార్డు స్థాయికి చేరుకుంటున్నాయి. గురువారం ఒక్కరోజే నంద్యాల జిల్లా సంజామలలో అత్యధికంగా 45.1 డిగ్రీల సెల్సియస్ ఉష్ణోగ్రత నమోదైంది. రాబోయే మే, జూన్ నెలల్లో ఎండలు మరింత తీవ్రంగా ఉంటాయని, ఉష్ణోగ్రతలు 45 డిగ్రీలు దాటవచ్చని వాతావరణ నిపుణులు హెచ్చరిస్తున్నారు.

గురువారం రాష్ట్రంలోని 215 మండలాల్లో 40 డిగ్రీలకు పైగా ఉష్ణోగ్రతలు రికార్డయ్యాయి. కోస్తా, రాయలసీమ ప్రాంతాలు వేడికి అట్టుడికిపోయాయి. శుక్రవారం కూడా మన్యం, పల్నాడు, ప్రకాశం, నెల్లూరు, రాయలసీమ జిల్లాల్లో 43-44 డిగ్రీల వరకు ఉష్ణోగ్రతలు నమోదయ్యే అవకాశం ఉందని విపత్తుల నిర్వహణ సంస్థ తెలిపింది. సుమారు 30 మండలాల్లో తీవ్ర వడగాల్పులు, మరో 55 మండలాల్లో వడగాల్పుల ప్రభావం ఉంటుందని హెచ్చరించింది.

ఈ ఏడాది వేసవి తీవ్రతకు బలహీనపడిన తూర్పు గాలులే ప్రధాన కారణంగా నిపుణులు విశ్లేషిస్తున్నారు. హిందూ మహాసముద్రం, బంగాళాఖాతంలో పరిస్థితులు అనుకూలంగా లేకపోవడంతో వేడిని తగ్గించే తూర్పు గాలుల ప్రభావం తగ్గింది. అదే సమయంలో, ఉత్తరాది నుంచి వీస్తున్న పొడి, వేడి గాలులు దక్షిణాది రాష్ట్రాలపైకి ప్రభావం చూపుతున్నాయని ఇస్రో నిపుణులు తెలిపారు. దీనికి తోడు, పసిఫిక్ మహాసముద్రంలో లానినా బలహీనపడటం కూడా వాతావరణం వేడెక్కడానికి దోహదం చేస్తోందని వారు అంచనా వేస్తున్నారు.

నగరాలు, పట్టణ ప్రాంతాల్లో 'అర్బన్ హీట్ ఐలాండ్స్' ప్రభావం వల్ల వేడి తీవ్రత పెరుగుతోందని, ఇది ప్రజల ఆరోగ్యం, వ్యవసాయ దిగుబడులపై తీవ్ర ప్రభావం చూపుతుందని నిపుణులు ఆందోళన వ్యక్తం చేస్తున్నారు. ఆకస్మిక వర్షాలు కురిస్తే తప్ప ఈ వేడి నుంచి ఉపశమనం లభించడం కష్టమని వారు అభిప్రాయపడుతున్నారు.