కార్లు, బైకులపై భారతీయుల మోజు.. మార్చి నెలలో అమ్మకాల జోరు

భారత ఆటోమొబైల్ రంగం మార్చి నెలలో బలమైన వృద్ధిని నమోదు చేసింది. ముఖ్యంగా ప్యాసింజర్ వాహనాల (కార్లు) విక్రయాలు గతేడాదితో పోలిస్తే 16 శాతం పెరిగాయి. ఈ మేరకు సొసైటీ ఆఫ్ ఇండియన్ ఆటోమొబైల్ మాన్యుఫ్యాక్చరర్స్ (సియామ్) మంగళవారం గణాంకాలను విడుదల చేసింది.

సియామ్ నివేదిక ప్రకారం, గత ఏడాది మార్చిలో 3,81,358 యూనిట్లుగా ఉన్న ప్యాసింజర్ వాహనాల విక్రయాలు, ఈ ఏడాది మార్చిలో 4,42,460 యూనిట్లకు చేరాయి. మార్కెట్లో పెరిగిన డిమాండ్, డీలర్‌షిప్‌ల వద్ద ఇన్వెంటరీ పెరగడం ఇందుకు ప్రధాన కారణమని సియామ్ పేర్కొంది. ఇదే సమయంలో ద్విచక్ర వాహనాల విక్రయాలు కూడా 19.3 శాతం పెరిగి 19,76,128 యూనిట్లకు, త్రీవీలర్ల విక్రయాలు 21.4 శాతం పెరిగి 76,273 యూనిట్లకు చేరాయి.

ఈ వృద్ధి ధోరణి ఫిబ్రవరి నుంచి కొనసాగుతోంది. ఫిబ్రవరిలో కూడా వాహన విక్రయాలు వార్షిక ప్రాతిపదికన 10.6 శాతం పెరిగాయి. పండుగల సీజన్, జీఎస్టీ రేట్ల తగ్గింపు, కొత్త మోడళ్ల రాక వంటి కారణాలతో 2026 ఆర్థిక సంవత్సరంలో అమ్మకాల వృద్ధి 7 నుంచి 9 శాతం మధ్య ఉండొచ్చని నిపుణులు అంచనా వేస్తున్నారు.

అయితే, 2027 ఆర్థిక సంవత్సరంలో మాత్రం అధిక బేస్ ఎఫెక్ట్, మారుతున్న ఆర్థిక పరిస్థితుల కారణంగా వృద్ధి రేటు 4 నుంచి 6 శాతానికి పరిమితం కావొచ్చని భావిస్తున్నారు. ప్రస్తుతం మొత్తం ప్యాసింజర్ వాహన విక్రయాల్లో యుటిలిటీ వాహనాల (యూవీ) వాటా 67 శాతానికి చేరడం గమనార్హం. దీంతోపాటు సీఎన్‌జీ, ఎలక్ట్రిక్ వంటి ప్రత్యామ్నాయ ఇంధన వాహనాలకు కూడా ఆదరణ పెరుగుతోందని నివేదిక స్పష్టం చేసింది.