ఐపీఎల్‌లో శుభ్‌మన్ గిల్ అరుదైన ఘనత

గుజరాత్ టైటాన్స్ కెప్టెన్ శుభ్‌మన్ గిల్ ఇండియన్ ప్రీమియర్ లీగ్ (ఐపీఎల్) చరిత్రలో సరికొత్త రికార్డు సృష్టించాడు. ఈ టోర్నీలో 4,000 పరుగులు పూర్తి చేసిన అత్యంత పిన్న వయస్కుడిగా ఘనత సాధించాడు. ఆదివారం లక్నోలోని ఏకనా క్రికెట్ స్టేడియంలో లక్నో సూపర్ జెయింట్స్‌తో మ్యాచ్‌లో ఈ మైలురాయిని అందుకున్నాడు. గిల్ వయసు 26 ఏళ్లు.

ఈ మ్యాచ్‌లో 25 పరుగుల వ్యక్తిగత స్కోరు వద్ద గిల్ ఈ ఫీట్‌ను చేరుకున్నాడు. తన 118వ ఇన్నింగ్స్‌లో ఈ ఘనత సాధించి, ఐపీఎల్‌లో అత్యంత వేగంగా 4,000 పరుగులు చేసిన రెండో భారత బ్యాటర్‌గా నిలిచాడు. ఈ జాబితాలో కేఎల్ రాహుల్ (105 ఇన్నింగ్స్‌లు) అగ్రస్థానంలో ఉన్నాడు. ఓవరాల్‌గా చూస్తే క్రిస్ గేల్ (112), డేవిడ్ వార్నర్ (114), జోస్ బట్లర్ (116) మాత్రమే గిల్ కంటే వేగంగా ఈ మార్కును దాటారు.

2018లో కోల్‌కతా నైట్ రైడర్స్‌తో ఐపీఎల్ ప్రయాణాన్ని ప్రారంభించిన గిల్, ఆ జట్టుకు నాలుగు సీజన్లు ప్రాతినిధ్యం వహించాడు. 2022లో గుజరాత్ టైటాన్స్‌కు మారడం అతని కెరీర్‌కు కీలక మలుపుగా మారింది. అప్పటి నుంచి గుజరాత్ తరఫున 63 మ్యాచ్‌లలో 2,580 పరుగులకు పైగా సాధించాడు. 2022 సీజన్ నుంచి ఇప్పటివరకు ఐపీఎల్‌లో గిల్ కంటే ఎక్కువ పరుగులు చేసిన బ్యాటర్ మరెవరూ లేకపోవడం గమనార్హం.

ఇప్పటివరకు తన ఐపీఎల్ కెరీర్‌లో గిల్ 27 అర్ధ సెంచరీలు, 4 సెంచరీలు నమోదు చేయగా, వాటిలో 17 అర్ధ సెంచరీలు, నాలుగు సెంచరీలు గుజరాత్ టైటాన్స్ తరఫునే చేయడం విశేషం. ఇదే సీజన్‌లో ఢిల్లీ క్యాపిటల్స్‌తో జరిగిన మ్యాచ్‌లో గుజరాత్ తరఫున 2,500 పరుగులు పూర్తి చేసిన తొలి ఆటగాడిగా కూడా గిల్ నిలిచాడు.