'ది ప్యారడైజ్' నుంచి హీరోయిన్ ఫస్ట్ లుక్.. రెట్రో లుక్‌లో కయాదు లోహర్ అదుర్స్‌!

నేచురల్ స్టార్ నాని హీరోగా, దర్శకుడు శ్రీకాంత్ ఓదెల కాంబినేష‌న్‌లో రూపొందుతున్న భారీ యాక్షన్ డ్రామా 'ది ప్యారడైజ్'. ఈ సినిమా నుంచి చిత్ర బృందం ఓ ఆసక్తికరమైన అప్‌డేట్‌ను అందించింది. ఈ చిత్రంలో హీరోయిన్‌గా నటిస్తున్న కయాదు లోహర్ పుట్టినరోజు సందర్భంగా ఆమె ఫస్ట్ లుక్ పోస్టర్‌ను సోషల్ మీడియాలో విడుదల చేసింది. ఈ పోస్టర్‌లో కయాదు సరికొత్త రెట్రో లుక్‌లో ఆకట్టుకుంటున్నారు.

'దసరా' వంటి ఇండస్ట్రీ హిట్ తర్వాత నాని, శ్రీకాంత్ ఓదెల కాంబినేషన్‌లో వస్తున్న రెండో సినిమా కావడంతో 'ది ప్యారడైజ్' పై ముందు నుంచే భారీ అంచనాలు నెలకొన్నాయి. ఈ అంచనాలకు తగ్గట్టే మేకర్స్ సినిమాను ప్రతిష్ఠాత్మకంగా నిర్మిస్తున్నారు. తాజాగా విడుదలైన హీరోయిన్ ఫస్ట్ లుక్ సినిమాపై అంచనాలను మరింత పెంచింది.

ఈ చిత్రానికి త‌మిళ మ్యూజిక్ డైరెక్ట‌ర్‌ అనిరుధ్ రవిచందర్ సంగీతం అందిస్తుండటం మరో ప్రధాన ఆకర్షణ. ఎస్ఎల్‌వీ సినిమాస్ పతాకంపై సుధాకర్ చెరుకూరి ఈ చిత్రాన్ని భారీ బడ్జెట్‌తో నిర్మిస్తున్నారు. ఈ సినిమాలో మోహన్ బాబు, రాఘవ్ జుయల్, సోనాలి కులకర్ణి వంటి ప్రముఖ నటులు కీలక పాత్రలు పోషిస్తున్నారు. ఈ చిత్రాన్ని ఆగస్టు 21న ప్రపంచవ్యాప్తంగా విడుదల చేయనున్నట్లు చిత్ర బృందం ఇప్పటికే ప్రకటించింది.